MOKABAT sa 56 ka mga tawo ang nasikop ug labing minos P8.1 million nga balor sa illegal drugs ang nasakmit sa kapulisan ug Philippine Drug Enforcement Agency (PDEA) 7 sa tulo ka mga siyudad sa Metro Cebu.
Labing daghan ug labing dako nga balor sa illegal drugs nasakmit sa kapulisan sa Dakbayan sa Talisay sa ilang Oplan Limpyo.
Ang Talisay City Police Station nakasikop og 46 ka drug personalities, 17 niini mga high value target (HVT).
Nagsugod ang anti-drug operation alas 3 sa Sabado sa kaadlawon, Enero 11, sa managlahing mga lugar sa dakbayan.
Target sa kapulisan ang Obrero drug group nga naglihok sa siyudad sa Talisay ug mga silingang lungsod sa probinsya sa Sugbo, lakip na sa Dakbayan sa Sugbo.
Ang Obrero drug group maoy labing dako nga drug supplier sa Siyudad sa Talisay, matod sa kapulisan.
Moabot ngadto sa 800.53 gramos sa gituohang shabu ang nasakmit nga mobalor ang tanan og P5,443,604.
Lakip sa nakuha ang tulo ka mga armas ug mga gamit sa paghingos sa illegal nga drugas sa 13 ka mga buy-bust operation.
OBRERO DRUG GROUP
Alas 3:02 sa kaadlawon, unang nadakpan si Jemely Obrero sa sitio Sambagan, Tanke ug laing kauban niini nga nakuhaan og 10.3 gramos nga shabu.
Pagka alas 5 sa buntag, nadakpan usab si Ryan Paul Soriano ug laing tulo ka mga tawo sa sitio Nonoc, Barangay Tabunok, kinsa nakuhaan og 95 gramos nga shabu.
Ang labing dako nga nakuha mao ang high value target sa barangay Sambagan, Barangay Tanke, Siyudad sa Talisay nga si Junel Moron Austria, kinsa nasakmitan og 595 gramos nga adunay Dangerous Drugs Board (DDB) value nga P4,046,000.
Matod ni Police Major Ace Gerard Pelare, hepe sa Talisay Police Station, ang pamilyang Obrero dugay na nga nag-operate sa illegal nga drugas.
Gitumbok ni Pelare ang inahan niini nga maoy nagmando kinsay baligyaan sa illegal nga drugas.
Gipaubos nila kini sa taas nga panahon sa surveillance.
“It has a month long surveillance and we tried to check sa ilang mga down lines. So, pag conduct namog simultaneous and synchronized operations, we arrested those people who are under links. Nakita pud nato unsa ka lawma ilang duwa and true enough it’s their mother who is the one directing the syndicate,” matod ni Pelare.
Si Amalia Padigos Obrero, labing hamtong sa nadakpan sa pangidaron nga 60, lakip sa nasikop uban sa upat niya ka mga anak ug umagad, mihimakak nga nalambigit ang ilang pamilya sa illegal nga drugas.
Matod ni Amalia nga usa siya ka manindahay og isda sa Pasil ug sa dihang gironda kaniadto ang ilang balay kay gihimo kining suyopanan, wala na sila mohimo niini.
Niadtong panahona sa tinukhangay, apil siya nga nitahan ug mipaubos sa rehabilitation program sa gobyerno.
Bisan pa man, matod niya nga di siya tiggamitan sa illegal nga drugas.
“Mamasil (Pasil) na unta ko padung, pero mao may paghamag sa mga pulis maong midiretso nalang kog hupo, ligid nalang ko. Sukad, Sir, wala gyud ko ana, ” matod ni Amalia.
Sa 46 nga nadakpan, adunay usa nga buntis nga manganakay na karong buwana ug usa ka 15 anyos nga dalagita.
Gibutyag sa 15 anyos nga wa siya malambigit sa illegal nga drugas, apan ang iyang hinigugma maoy nagpadagan lang sa kwarta ug igo ra sila nga namorsyento.
Si Mayor Gerald Anthony “Samsam” Gullas Jr. nga nisaksi sa inventory sa nasakmit nga drugas, nalipay sa resulta sa anti-drug operation sa kapulisan sa iyang siyudad.
Alang niya nga magpadayon ang subsob nga kampanya sa kapulisan ug ang iyang makanunayon nga suporta sa war on drugs.
Nasurpresa usab siya nga adunay duha nga lakip sa nadakpan nga nag trabaho sa Talisay City hall nga naatlan nga naa sa balay sa mga Obrero nga nag-inom.
CEBU CITY
Sa Dakbayan sa Sugbo, labing minos P2 million nga illegal drugs ang nasakmit sa Cebu City Police Office (CCPO) sa Sabado sa kaadlawon.
Si Police Major Kenneth Paul Albotra, hepe sa San Nicolas Police Station, uban sa Drug Enforcement Group, nakadakop og upat ka HVT sa duha ka buy-bust operations sa duha ka managlahi nga mga dapit sa Siyudad sa Sugbo.
Pasado alas 12 sa kaadlawon sa Sityo Menulida, Barangay Calamba, Siyudad sa Sugbo, nasikop ang duha ka drug personalities.
Ang mga nadakpan mao sila si Jhon Vladimir Cebes, alyas Opao 18, taga Purok 3, Barangay Kamputhaw, kinsa apil sa listahan sa regional level sa HVT ug target ug drayber nga si Nathaniel Alimorin, 46, drayber, taga Sityo Bagumbayan, Barangay Tinago, Siyudad sa Sugbo.
Si Alimorin nalakip sa gi-monitor sa Station 6 nga maoy tighatud og illegal drugs.
Sa maong buy bust operatio, nasakmit gikan sa duha ang P1.7 milyones nga balor sa shabu base sa DDB value.
Pipila ka oras ang milabay, lain na usab nga buy bust operation ang gihimo sa grupo ni Albotra.
Ning higayuna, sa Block 7, Barangay Sawang Calero, Siyudad sa Sugbo.
Ang nadakpan giila nga si Randy Demesilio, 32, lumolupyo sa maong lugar.
Dugang ni Albotra nga si Demesilio makonsiderar gihapon nga HVT sa regional level tungod sa kadako sa kantidad sa shabu nga nakuha gikan kaniya nga P918,000.
MANDAUE CITY
Usa ka HVT ug iyang bata-bata nasikop sa kapulisan sa Dakbayan sa Mandaue human nakuhaan og P102,000 sa shabu atol sa buy-bust operation sa SB. Cabahug St., Ibabao-Estancia, Mandaue City sa alas 2:45 sa kaadlawon.
Si Rajhnie Go, 34, taga Ibabao-Estancia, Mandaue City, ug iyang bata-bata nga si Kennedy Sebial, 20, taga Panagdait, Cebu City nadakpan sa kapulisan sa Mandaue nga gipangulohan ni PLt. Col. Franco Oriol.
Manggamitay ang duha ka suspek, apan si Go lang ang mamaligya og illegal nga drugas sigon ni PMaj. Mercy Villaro, tigpamaba sa Mandaue City Police Office.
Ang ngalan ni Go sauna ra nigawas nga mamaligya og drugas samtang si Sebial bag-o lang nga nailhan nga nalambigit sa illegal nga drugas, sigon ni Villaro.
Ang buy bust operation nahinayon sa duol sa balay ni Go.
Ang duha ka suspek puro walay mga trabaho ug sigon ni Villaro nga si Go ang pagpamaligya lang og illegal nga drugas ang panginabuhi niini. Nakuhaan ang duha og P102,000 nga balor sa illegal drugs.
PDEA
Nasikop usab sa Philipine Drug Enforcement Agency (PDEA) 7 ang upat ka mga tawo sa ilang labing unang operasyon karong tuiga sa dakbayan sa Sugbo.
Si Liea Alcantara, tigpamaba sa PDEA 7, niingon nga ang operasyon gipahigayon sa dan A.Lopez, Barangay Labangon, Siyudad sa sugbo.
Kini human sa sunod sunod nga mga reklamo sa mga silingan.
Duha sa mga suspek giila nga sila si Edgar Acalano Magno, giingong nagmintinar sa drug den ug kapuyo nga si Marilou Abejo Fuentes 42. /