NAILHAN na sa kapulisan sa lungsod sa Carmen ang lalake nga gipanitan ang nawong ug gilugit ang duha ka mga kalimutaw sa mata human nga ang igsuon mipatim-aw sa police station.
Nagtuo usab ang kapulisan nga panimawos ang motibo sa pagpatay kay posibleng gidudahan ang biktma nga asset sa kapulisan.
Ang persons of interest karon sa kapulisan mga drug personality sa lungsod, kinsang igsuon napatay sa miaging tuig.
Giila ang biktima nga si Edgardo Marco Corbo, 34, alyas Butak, taga Upper Labogon, Siyudad sa Mandaue.
Ang igsuon sa biktima nga si Roberto, uban sa iyang iyaan, niila kang Edgardo ug nibutyag nga nalisoan na kini sa pangisip.
Niadtong Nobiyembre 2019, nibiya kini sa ilang balay sa Labogon ug wa na sila masayod nga naabot diay kini sa lungsod sa Carmen.
Sa nakuha nga impormasyon sa kapulisan, si Edgardo nagbaktas lang kini gikan sa Dakbayan sa Mandaue hangtod nga naabot sa Carmen.
Wa na kini mopauli sa ilang balay kay adunay usa ka pamilya nga magpakaon niini.
Gihulagway sa mga lumolupyo sa Brgy. Puente, Carmen nga ang biktima di manghilabot mao nga tungod niini daghang mga lumolupyo ang gusto nga mopakaon kang Edgardo.
Human masayod ang kapulisan ug ang mga official sa Barangay Puente kalabot sa hitabo, aduna na silay gipangdudahan nga mga responsabli.
PANIMAWOS
Duha ka mga magsuon karon ang matawag nga persons of interest sa pagpatay kang Edgardo.
Giingong naalaan nga police asset si Edgardo nganagpaboang-boang lang ug maoy nagtumbok sa igsuon sa duha nga persons of interest nga nalambigit sa illegal nga drugas.
Ang igsuon sa duha gipusil patay niadtong Nobiyembre sa milabayng tuig, nga natakdo sa pag-abot ni Edgardo sa dapit.
Nagtuo ang kapulisan nga panimawos ang motibo sa pagpatay sa biktima base sa gibuhat niini.
Gigulgol ang liog ug gilugit ang mga mata niini, timaan nga dunay kasuko ang killer o killers.
Matod ni Police Major Roger Quijano, hepe sa Carmen Police Station, nga di lang una nila nganlan ang mga persons of interest sanglit wa pa silay igong basehanan sa pasangil.
Apan iyang gipasabot nga motakdo ang tanang impormasyon nga ilang nakuha gikan sa Barangay Puente nga kining magsuon nanganti nga mo bawos sa nagpatay sa ilang maguwang.
Giingong nalambigit sa illegal nga drugas ang magsuon lakip na ang igsuon niini nga gipatay niadtong Nobiyembre.
Niadtong Biyernes sa gabii, ilang giadto ang balay sa magsuon, apan wala kini mopauli, lakip ang ilang inahan.
“Nasuko sila kay nagtuo siguro nga police asset katong boang kay nagpaboang-boang lang ang ilang pagtuo. Unya naa man puy nakadungog nga naay usa nila nga nisiyagit nga dili gyud kuno sila makadawat sa nahitabo sa ilang igsuon,”matod ni Quijano.
Si Police Colonel Roderick Mariano, hepe sa Cebu Provincial Police Office, nimando karon sa Carmen Police Station, nga mokuhag igong ebendensya batok sa mga persons of interest alang na sa pagpasakag kaso.
Gisalikway na ni Mariano ang pagduda nga kini hinimoan sa mga sakop sa usa ka kulto nga naglihok sa mga bukirang dapit sa siyudad sa Danao ug Carmen. /