DIRIYOT maharos sa Carcar City Division ang Sinulog sa Kabataan sa Lalawigan, Sabado, Enero 11, 2020.
Ang Carcar maoy defending champion sa Sinulog-based category ug mao usab ang grand slam winner sa Pasigarbo sa Sugbo niadtong Agusto, 2019.
Gawas lang sa street dancing category, diin giproklamar sila nga second placer, ang Carcar maoy mananaog sa Best in Costume, Best in Musicality ug Ritual Showdown.
Mokabat og P550,000 ang nadawat nga premyo sa de momenos 50 ka mga mananayaw ug propsmen sa Dakbyan sa Carcar.
Si Mayor Mercedita Apura nagkanayon nga ubos lamang sa 40 ka-adlaw ang ilang preparasyon alang sa panagsangka.
“Naka-feel gyud mi og pressure, apan ang importante kay bisan unsa man ang mamahimong resulta, kining tanan among gihalad ni Señor Sto. Niño,” matod ni Apura.
Migasto og P5 milyones ang Kagamhanan sa Carcar alang sa ilang Sinulog-based nga presentasyon nga nagsentro sa malig-on nga pagsalig sa Balaang Bata.
Gawas sa Carcar, laing mananaog sa ritual showdown sa Sinulog sa Lalawigan mao ang Talisay City Division (2nd); Lapu-Lapu City (3rd); Bogo City (4th); Toledo City (5th); ug Lungsod sa Ginatilan (6th).
Alang sa kategoriya sa street dancing, ikatulong mananaog mao ang Dakbayan sa Lapu-Lapu samtang ang Talisay nakadawat sa first prize.
Sa kategoriya sa best in musicality, gisundan sa Talisay ang Carcar.
Ang ubang mananaog mao ang Lapu-Lapu (3rd), Bogo (4th) ug Toledo (5th). / RTF