GIDAGSA sa mga nangindahay nga mapalad makasulod sa trabaho ang Kuyamis Festival 2020 job fair niadtong Enero 8, 2020.
Basi sa datos gikan sa Public Employment Services Office (PESO)
mikabat sa 2,134 ka mga aplikante ang miaplay.
Di momenos 5,000 ka mga lokal ug international nga mga trabaho ang gitanyag.
Sa maong gidaghanon adunay 33 ka mga aplikante ang hired on the spot ug liboan ang gipasaligan nga tawagan alang sa ilang final interview.
Sa iyang bahin, si Misamis Oriental Governor Bambi Emano gikalipay ang pagsugod sa Kuyamis Festival lakip na sa highlights ang job fair kun diin dili lang mohatag lingaw ang kalihukan makahatag pa og panginabuhian sa Misamisnon.
Gihangyo niini ang mga kompaniya nga kun mahimo dili na kaayo lisud-lisuron ang mga aplikante sa ilang pagsulod og trabaho, tungod kay nagtuo kini nga basta Pilipino ang manarbaho, pulido, ug de kalidad ang agi.
Usa ka aplikante nga si Miriam Jangao, taga Macabalan, niingon nga lima na ka bulan siya nangaplay og trabaho ug sa job fair namasin nga makatrabaho labina nga nagtuo siya nga kwalipikado siya sa posisyon nga gi-aplayan.
"I am crossing my fingers nga unta madawat ko. Dili lang sab isa ako gihatagan og application letter pero nagpasa pod ko sa uban atong mga trabaho nga feel nako makaya pod nako," sulti niini sa SunStar Superbalita.