PATAY ang usa ka driver human kalima nabangga niadtong Enero 9 sa gabii sa Barangay Aglayan, Malaybalay City.
Giila ang biktima nga mao si Raul Corona Sr., 60, minyo, taga Barangay 1, Malaybalay City.
Sa imbestigasyon sa Malaybalay Police Station sa pagpangulo ni Police Lieutenant Colonel Jerry Tambis nasuta nga kining Toyota Land Cruiser paingon sa National Secondary Road sa Barangay Aglayan gikan sa Lantapan, Bukidnon.
Apan pag-abot sa dapit mi-ekis kining sakyanan ug nipaingon sa kilid nga bahin hinungdan nga unang mibangga sa naka-parking nga motorized sikad nga gipanag-iya ni Gregorio Bundad Jr.
Sunod nga gibanggaan niini ang usa ka motorsiklo nga gipanag-iya ni Gregorio Bondad Sr., wala na niini makontrol ang sakyanan ug mibangga na usab kini sa tindahan nga gipanag-iya ni David Kitab.
Maoy hinungdan nahulog nasab dayon kini paingon sa kilid sa laing puloy-anan ug sunod sa balay nga nabanggaan niini milahos kini sa sugarcane plantation nga pulos gipanag-iya sa pamilyang Labitad.
Nakaangkon og bun-og ang driver. Dihang gi-rescue ug gidala sa balay tambalanan, dead on arrival na nga gideklarar sa mga doktor.