Lola nga na hit and run patay, naila na

GIBIYAAN lang nga nagbuy-od sa kalsada ang usa ka lola niadtong Enero 10 mga alas 2:30 sa kaadlawon sa C.M Recto Highway, Barangay Gusa, Siyudad sa Cagayan de Oro.

Ang biktima naila na nga si Anita Hallazgo, 71, dalaga, taga Purok 4-A Galaxy, Gusa.

Sa impormasiyon gikan sa Police Station 3 (PS3) sa Agora, giingong subay sa mga nakasaksi nga samtang patabok ang biktima nabanggaan kini sa usa ka pribadong sakyanan.

Giingong nisibat ra usab ang sakyanan nga nakabangga nga usa ka Hyundai Accent color gray/silver nga dunay nakuhang plate number.

Gikabutyag nga gisubay sa sakyanan ang CM Recto nga bahin gikan sa silangang direksiyon paingon sa kasadpan apan pag-abot sa maong dapit nabanggaan ang biktima.

Pag-abot sa mga alas 3:30 sa kaadlawon gideklara patay ang biktima.

Ang patay nga lawas ang kasamtangang anaa sa Bollozos Funeral Homes sa Bulua ning dakbayan samtang padayon pa nga gipangita ang responsableng driver.