MATI CITY, Davao Oriental -- "The bays are remarkably clean!" kini ang makahinganghang tubag ni Most Beautiful Bays in the World (MBBW) Club founder ug manager Bruno Bodard dihang gipangutana sa iyang paghulagway sa kadagatan sa Mati City, Davao Oriental.
Si Bodard kauban si MBBW treasurer Guy Ettiene Rousset, anaa sa siyudad isip validators sa aplikasyon sa Pujada Bay nga mahilakip sa listahan sa MBBW.
Ang duha nga midalikyat sa pipila ka dapit sa Mati ug puros sila nagsulti nga nasurpresa sila sa ilang nakita.
"We have been surprised with what we discovered, it's much beautiful and clean than we expected," dugang ni Bodard.
Sabado, Enero 11, gihimo ang press conference sa Mati, diin ang duha nagkanayon nga molanat pa og duha ka bulan una masayran kun nakapasar ang Pujada Bay sa Mati, makaapil kini sa prestihiyosong listahan.
Luyo sa duha ka validators, anaa pa ang pipila ka opisyal, ug representante sa nagkadaiyang kontinente nga mobotar kun aprubado ang aplikasyon sa Mati.
“After our consultations with other officers we will vote. The result will be after two months," ni Bodard.
Malaumon, dugang plano
Kon mahimo mang kabahin ang Pujada Bay sa listahan sa MBBW, gibutyag ni Mati City Mayor Michelle N. Rabat nga dugang proyekto alang sa mas ikanindot pa sa lugar ang ilang himuon.
Gilantaw nga usa sa suliran mao ang pagdiretso sa mga hugaw padung sa dagat gikan sa mga nanimuyo daplin sa mga baybayon sa Mati.
Apan ni Rabat, karon pa lang, gihan-ay na nila ang Master Plan alang sa Sewerage System sa dapit.
"We are collaborating with other officials of the city for the project. Lahat ng waste leading to the bays be filtered first."
Dugang ni Rabat nga kun mabutang man sa listahan ang Pujada Bay, dako kining tampo, di lamang sa turismo, apan sa mga molupyo sa mga atraksiyon nilang dapit, nga sila mokita sab.
Ang kwalipikasyon aron mahimong apil sa MBBW suma nila Bodard ug Rousset angay nga ang lugar nasertipiko sa national level nga maanindot nga lugar, duna sab kini local environmental protection program ug nakigbulig sa international networks sa pagpalambo niini.
"We can help through promotion and we can entice more tourists to come in your city. Apart from that, it will also be a weapon to protect the island and be recognized," segund ni Rousset.
Dinhi sa Pilipinas, ang Puerto Galera Bay pa lamang ang naapil sa prestihiyosong listahan.