BANSALAN, Davao del Sur -- Kapin 60 na ka adlaw nga gipasirado sa Bansalan Water District ang dalan sa Barangay Poblacion Dos.
Kini human delikadong matumpag ang habog nga reservoir sa tubig nga miliki atol sa sagunsong linog niadtong Oktubre ug Disyembre 15 sa milabay'ng tuig.
Apan, sumala sa mga motoristang nakaagi sa lugar nga hasol na kaayo kanila ang pagtuyok-tuyok sa laing dalan aron makaabot sa publikong merkado.
Matod ni Irvin Kyle, 23-anyos, taod-taod na nga sirado ang maong dalan apan hangtud karon wa gihapon gipatrabaho sa Bansalan Water District ang reservoir.
Sa pagpanubay sa SunStar Superbalita, gibutyag ni Bise-Mayor Eugene Clata nga gipadalhan na og Memorandum Order sa munisipyo ang Bansalan Water District aron ayuhon ang reservoir ug maabli na ang dalan alang sa motorista.
Sumala niini, nga mokabat sa P2 milyones ang gitakdang budget alang sa pag-ayo sa reservoir.
Bisan mga molupyo sa lugar, mialma na sab sa taod-taod nga pagsirado sa maong dalan.