DAVAO DEL SUR -- Gisugdan na sa mga kapilya ug parokya sa lalawigan ang nobena alang sa kapistahan ni Señor Santo Niño.
Managlahi ang gitakdang petsa sa pagsaulog apan usa ang ilang tumong nga mao ang pagpangayo sa bendisyon ug grasya sa Diosnong bata.
Sa Barangay Malawanit sa Magsaysay, Davao del Sur, malipayon gihapon nga gisaulog sa mga biktima sa linog ang ilang patron Señor Santo Niño niadtong Biyernes, Enero 10, 2020.
Bisan anaa sa evacuation camps, gisaulog gihapon sa pamilyang Castro ang kapistahan dungan sa pagpasalamat sa batang Hesus nga wa sila'y tatsa gawas sa nagubang balay atol sa linog.
Nangandam na sab ang parokya alang sa kapistahan sa Enero 16.
Sa Sitio Kalamuhoy, sa Barangay Kapatagan, nangandam na ang mga molupyo sa ilang kapistahan sa Enero 15.
Apan, daghan sa mga panimalay nga nagpatron kang Señor Santo Niño ang mohimo sa ilang pagsaulog sa Enero 19, dungan sa pagsaulog sa dakbayan sa Sugbo, ang tinubdan sa imahe.
Luyo sa mga nasinating linog sa miaging tuig, usa sa ilang pangaliya sa patron mao ang kanunay'ng proteksyon, trabaho ug grasya nga sagad gihatag niini sa mga nag-deboto kaniya.