SA ubang mga lugar, ilabi na sa Estados Unidos, gilikayan ang mga komentaryo sa mga higala nga moingon, “Hala, nanambok lagi ka.” Giingon nga kining maong komentaryo moresulta sa depression sa tawo nga gikomentaryohan.
Maayo pa kadtong amahan kansang anak nangaplay sa pagkapulis. Ang recruitment officer niingon, “Noy, sorry kaayo. Di madawat ang imong anak kay daot kaayo.” Matod pa sa amahan, “Sagdi lang Sir, motambok ra na kon mapulis na.”
Dinhi sa ato, hayan nga ang mga tawo nga bug-at og timbang, entonces, tambok, di na pasakyon sa ride-hailing firm nga Angkas. Wa gyud ingna nga tambok, pero kasagaran sa mga pasahero nga bug-at, mao kadtong mga tambok.
Matod sa Angkas, alang kini sa safety sa pasahero ug sa driver sa motorcycle taxi. Sa ilang mobile app, kinahanglan nga ibutang ang gibug-aton sa pasahero aron ang mga bug-at nga pasahero di mapares sa motor ug drayber nga gamay.
Kinsa man sab kining maong brilliant idea? Ang inter agency technical working group (TWG) nga nangulo sa Motorcycle Taxi Service Pilot Implementation Run niklaro nga wa nila mandoi ang Angkas nga di pasakyon ang mga bug-at nga pasahero.
Si TWG consultant Alberto Suansing niingon nga ang ilang pahimangno sa Angkas mao nga kinahanglan nga luwas ang ilang mga pasahero. Giklaro ni niya kay morag silay gipasanginlan nga nagsugo sa Angkas nga di pasakyon ang mga tambok.
Giklaro sab sa Angkas niadtong Biyernes, Enero 10, nga wa pa nila ipatuman ang ilang bag-ong app nga dunay “weight safety check” feature. Sa ato pa, makasakay pa ang mga tambok sa ilang mga motorcycle taxi, sa pagkakaron.
Sa maong app, pangutan-on ang pasahero kon pila ang iyang timbang. Mag-unsa na man lang unya ang mga tambok ug mgas bug-at nga tawo kon di na sila pasakyon sa Angkas. Adto na lang sila sa JoyRide ug sa Move It?
Si David Medrana, operations chief sa Angkas, niingon nga ang “weight safety check” feature naa na sa ilang passenger safety cards. Ang kaluwasan ra gyud maong ilang tumong, matod niya. Pero di ba kini usa ka matang sa discrimination?