MASINATI na ang lahi nga kaalegre sa dakbayan sa Sugbo ug bisan sa tibuok Metro Cebu. Mas midaghan ang mga tawo sa kadalanan ug malls. Mas misamot kahuot ang sitwasyon sa trapiko. Dili nato kini malikayan tungod sa pagsulod na sa semana sa Sinulog sa Sugbo ug nagkaduol nga pisyesta sa balaang imahen ni Señor Sto. Niño karong Dominggo, Enero 19.
Pit Senyor! Una sa tanan, mapasalamaton kita sa laing tuig ng kasaulogan sa Sinulog ug mosabot sa kahimtang sa dakbayan nga kinahanglan og igong pasensiya sa atong paglihok. Dili lang mga deboto ang naghinayhinay na og pangabot sa Sugbo apan, lakip na sa mga lokal nga turista ug langyaw gikan sa nagkalainlaing nasod sa kalibotan. Usa ang Sinulog sa mga rason nga nagbutang sa Sugbo sa mapa sa kalibotan sa turismo.
Ug taliwala sa mga kalingawan sa Sinulog, kinahanglan nga dili nato kalimtan ang relihiyusong bahin bisan ngadto sa mga bisita nga dili magtutuo nga ang Señor Sto. Niño maoy sentro sa kapistahan ug gabayan sa tanang kalihokan bisan sa gitanyag sa mga pribadong grupo o estabilisemento ug lokal nga kagamhanan.
Manghinaut kita nga magmalampuson gihapon ang Sinulog 2010 pinaagi sa pagsuporta sa mga Sugbuanon sa bisan unsa ginagmay o dinagko nga bahin, sama sa pagmintinar sa kahusay ug kalinaw lakip sa maayong pag-abi-abi sa mga bisita o dumuduong sa pista. Ang mga awtoridad mas mahimong epektibo sa ilang tahas ubos sa pag-abag sa yano nga mga sibilyan nga mas nasayod sa kahimtang sa ilang kasilinganan.
Bisan ang sekreto nga pagtaho ngadto sa awtotidad sa namatikdan nga dautang lihok o laraw sa grupo o indibiduwal sa iyong dapit, dako kini matabang sa kaluwasan ug alang sa kamlaposan sa Sinulog Festival 2020 ug kapistahan sa Batang Balaan sa Sugbo. Aktibong magpakabana.
Sa makausa pa, mag-ampo kita, Pit Senyor sa tanan!