Live-in partners minglampos sa Cebu marathon

Live-in partners minglampos sa Cebu marathon

SA usa ka talagsaong hitabo, mag-live in partners nga sila si Azlan Pagay ug Ruffa Sorongon ang ningpatigbabaw sa 2020 Cebu Marathon kagahapon, Enero 12, sa Cebu Business Park.

Si Pagay mao ang naghari sa men’s 42K category samtang si Sorongon ang midaog sa women’s 42K division.

“Blessing ni sa Ginuo ang among talent. Laing blessing ni sa Ginuo ang among kadaugan,” matod ni Pagay sa interbyu sa Sun.Star Cebu, igsuong buhatan ning mantalaan.

Si Pagay, 26, kinsa lumad nga taga Davao City, mitaak sa finish line sulod sa duha ka mga oras, 53 ka mga minutos ug 45 ka mga segundos aron dag-on ang labing una niyang 42K title sa Cebu Marathon.

Nagsunod kang Pagay mao si Joseph Arnel Emmia, kinsa mirehitro og oras nga 2:54:54, samtang ikatulo si Michael Largo, kinsa adunay oras nga 3:05:57.

Si Sorongon, 28, kinsa lumad nga taga Sultan Kudarat, miposte sa iyang ikaduhang sunodsunod nga kadaugan sa women’s 42K pinaagi sa oras nga 3:25:34.

Dominado ni Sorongon ang lumba ug nabiyaan niya ang nagsunod kaniya nga si Evarnie Villarin og 10 ka mga minutos.

Si Lizane Abella maoy miangkon sa ikatulong dapit pinaagi sa oras nga 3:31:42.

“Nagsugod ang among relasyon sa pagsungogsungog sa among mga kaila. Sulod na sa pito ka mga tuig ang among relasyon ug ang pareho namong interes sa pagdagan nakatabang aron magkasinabtanay mi,” matod ni Sorongon.

Sila si Pagay ug Sorongon mibiya sa ilang tagsatagsa ka mga lugar sa Mindanao aron manimpalad dinhi sa Sugbo mga unom na ka tuig ang nakalabay. Una silang nagkatagbo sa Davao City.

Nagsugod sila pagsalmot og running events sa Sugbo niadtong 2014 hangtod nga nakaapil na sila og nagkadaiyang national ug international running competitions.

Kon buot hunahunaon, ikaupat na kini nga higayon nga parehong mingdaog sila si Pagay ug Sorongon sa usa ka lumba.

Matod ni Sorongon nga ang labing unang higayon nga dungan silang mingdaog nahitabo sa 21K category sa Elizabeth Run ug gsiundan kini sa 32K sa Eleven Run Series ug Palawan Marathon niadtong 2019.

Parehong gibutyag sa duha ka managhigugmaay nga ang labing nindot alang kanila mao ang mga higayon nga dungan silang mobiyahe aron mosalmot og kompetisyon.

“Mura mi’g mag-date kon moapil mi’g competition sa gawas sa Cebu,” asoy ni Sorongon.

Ang duha nakapalit na og balay ug yuta sa City of Naga gikan sa ilang mga nadaog sa mga lumba sa dagan.

“Lisod kaayo ang running maong kinahanglang gamiton gyud sa maayo ang among kinitaan,” dugang ni Sorongon, kinsa nibutyag nga nakapalit na sab sila og motorsiklo ug gamay nga piggery.

Ang sunod nga tahas nila ni Pagay ug Sorongon mao ang Milo Marathon National Finals karong Enero 19 sa Tarlac City.

Sa laing bahin, nikawat og atensyon sa 13th edition sa Cebu Marathon ang pag-propose ni elite triathlete Paul Jumamil ngadto sa iyang hinigugma nga usa sab ka triathlete nga si En Torres sa Cebu Business Park.

Sa 21K, ang midaog sa men’s category mao si Kenyan Eric Chepsiror (1:15:42), ikaduha si Prince Joey Lee (1:18:02) ug ikatulo si Downs Fabian (1:20:01).

Sa 21K women’s, milampos si Cherry Andrin (1:40:21), ikaduha si Engiel Estillorie (1:50:24) ug ikatulo si Jenefer Paloma (1:56:15).

Sa 5K race, si Alfrence Braza (16:36) maoy midaog men’s division samtang si Marielle Estreba (19:50) sa women’s category. (RSC, ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph