GIPAMATUD-AN sa Los Angeles Lakers nga kaya nilang mobarog bisan wala ang ilang duha ka mga lider nga sila si four-time MVP LeBron James ug Anthony Davis pinaagi sa pagmakmak sa hosts Oklahoma City Thunder, 125-110, kagahapon sa National Basketball Association (NBA).
Balanseng ataki ang gihimo sa Lakers aron tapakan ang dakong haw-ang sa pagpadaplin sa ilang duha ka superstars diin pito sa ilang mga magduduwa ang nakamugna og dobleng numero nga puntos.
Gipangulohan ni Kyle Kuzma ang opensiba sa Lakers pinaagi sa iyang season-high nga 36 puntos samtang nidugang og 21 puntos ang beteranong si Rajon Rondo.
Si James, kinsa nag-average og 25.4 puntos, adunay gipamating sakit sa iyang lawas partikyular sa iyang dughan samtang si Davis, kinsa nag-average og 27.1 puntos, nagpaalim sa iyang angol sa ikaduha nang sunodsunod nga duwa.
“That’s why you have a great team,” matod ni Lakers guard Quinn Cook, kinsa niamot og 13 puntos alang sa kadaugan.
“We want to have guys who contribute one through 15. That’s the goal of anybody putting a team together. Obviously, this team is talented. Everybody is selfless and everybody is ready. We all put the work in.”
Ang Lakers padayong naghupot sa liderato sa Western Conference bitbit ang 32-7 nga rekord samtang ang Thunder nasugamak sa 22-17 nga baraha.
Alang kang Kuzma, si Rondo maoy nag-agak kanila ning maong dalaygong kadaugan.
“I just got an opportunity to get scoring opportunities, having the ball in my hands,” batbat ni Kuzma.
“Rondo set the tone for us. Going right after CP (Chris Paul) right out of the gate, being aggressive with his scoring. A lot of times, everybody knows him as a pass-first guy. He came out today in attack mode.”
Gawas sa iyang opensa, si Rondo nakaamot sab og 12 rebounds ug walo ka assists.
Pagsugod pa lang sa kombati, nagbangis na dayon ang Lakers ug nakaposte kini’g 73-49 nga labaw sa halftime. Mao kini ang labing dako nga biya sa Thunder human sa halftime ning maong season.
Padayon ang kamangtas sa Lakers ug nainat pa nila ang ilang labaw ngadto sa 32 puntos sa 3rd quarter. Nahuman ang 3rd quarter nga naglabaw gihapon og dako ang Lakers, 102-82.
Ang Thunder gipangulohan nila ni Shai Gilgeous-Alexander ug Danilo Gallinari pinaagi sa ilang 24 puntos matag usa.
“I thought that they brought the energy and the intensity, and we didn’t match it from the first minute,” asoy ni Gallinari.
Sa laing mga duwa, ningdaog ang Houston Rockets batok Minnesota Timberwolves, 139-109, Dallas Mavericks batok Philadelphia 76ers, 109-91, Boston Celtics batok New Orleans Pelicana, 140-105, Cleveland Cavaliers batok Denver Nuggets, 113-103, Milwaukee Bucks batok Portland Trail Blazers, 122-101, ug Chicago Bulls batok Detriot Pistons, 108=99. (AP, ESL)