SUPERBALITA CEBU

'Guardian app' moabag sa kaluwasan sa Sinulog

AWHAG NI KONSEHAL ZAFRA: Miawhag si Konsehal Phillip Zafra (wala), chairman sa public order and safety, sa publiko nga mo-download gikan sa Google Play ug mo-install sa ilang mobile phones sa Guardian Emergency Response app nga gigamit na karon sa dakbayan sa Sugbo alang sa pagduma ug pagtubag sa mga emerhensiya ug kakulian. (Tampo nga hulagway)

PAWNGON o dili ang cell sites sa telecommunication companies sa Sinulog Festival, dunay emergency app nga padayong magamit sa katawhan pinaagi sa ilang mobile phones.

Apan kinahanglan nilang naka-install daan sa Guardian Emergency Response nga mobile app ug nakarehistro na sa sistema nga gamit na karon sa kagamhanan sa dakbayan sa Sugbo, matod ni Konsehal Phillip Zafra, chairman sa public order and safety sa konseho sa Cebu City.

Kon walay pagpamalong, magamit gihapon ang app kon may mahitabong insidente nga kinahanglang itaho atol o bisag human na ang Sinulog, dugang ni Zafra.

Makakuha ang mga naggamitan og Android mobile phone sa maong mobile app gikan sa Google Play dayon maka-instalar nga libre, matod ni Cloyd Dedicatoria, tagduma sa SugboTek, Inc., ang software development company nga nimugna sa maong app.

Gi-send off sa mga opisyales sa dakbayan ang field engineers sa SugboTek nga nanaud og mga CCTV camera sinangkap sa Panasonic ug mga WiFi access points, tampo sa kompanya sa dakbayan ug agi og halad pasalamat niini sa Balaang Batang Hesus.

Bisan kon may shutdown, gamit sa kaugalingong internet gateway sa SugboTek, makadagan ang maong mga ekipo sa mga dapit ug kadalanan nga ruta sa Traslacion inig Enero 17, prosisyon inig Enero 18 ug sa dayong parada sa Enero 19, mibutyag si Dedicatoria.

Samtang, gisaksihan sa mga opisyales ang pagpanalangin sa Guardian command vehicle nga magsilbing mobile operation center (Opcen), sumpay sa Multi-Agency Coordination Center (MACC) diha sa social hall sa City Hall atol sa mga adlaw sa Fiesta Senyor.

Gawas sa duha, ang mga opcen sa mga barangay Santo Niño, Apas, Tisa ug Poblacion Pardo ug Bantay Mandaue modugtong alang sa mas organisadong pagtubag kon may panghitabo, sumala pa.

Daan nang migamit sa Guardian ang Philippine National Police (PNP) Communications and Electronics Service (CES) nga nagbase sa Camp Crame atol sa Sinulog 2019 sa dihang gitak-opan sa mga telco ang ilang mobile ug internet service uban sa pakig-abag sa National Civil Defense Network (NCDN).

Gisugdan ang Guardian sa 2017 nga gi-pilot sa upat ka mga barangay sa dakbayan. Misunod ang Mandaue City sa hinapos nga bahin sa 2018 nga nakaangkon sa dakbayan sa National Digital Governance (eGov) Award ubos sa kategoriyang Costumer Empowerment.

Misunod ang Cebu City human gipirmahan ni Mayor Edgardo Labella ang memorandum of agreement (MOA) tali sa SugboTek niadtong Oktubre 30. Mosunod na sab unya ang Talisay City human gitugtan sa konseho niini si Mayor Gerald Anthony Gullas, Jr. nga mopirma sab sa susamang MOA.

Maalerto sa maong app ang pinakaduol nga kahimanan sa Guardian kansang operator mao na’ay manawag sa nanawagan alang sa mga detalye. Gamit ang managsamang software, ipadala niini ang kahimanan ug mga gikinahanglang makaabag, nipasabot si Dedicatoria.

Gawas sa mga kawani ug kahimanan sa LGU ug mga ahensiya sa kagamhanan, maalerto sab sa Guardian ang mga niparehistro nga volunteer responders, sama sa mga doktor, nars ug tanod, siya midugang. (PR)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph