MOKABAT og P570,000 ang nabulsa nga premyo sa di mominos 50 ka mga mananayaw ug propsmen sa Tribu Lumad Basakanon.
Nakahilak sa tumang kalipay si Kapitan Norman Navarro sa dihang nahinabi sa mga tigbalita human sila giproklamar nga grand slam champion.
“Sa 31 ka tuig namong pag-apil sa Sinulog, kadaghan na mi nakasuway og kadaugan ug kapildihan apan kining tanan among gihalad kang Señor Sto. Niño,” matod ni Navarro.
Gawas sa trademark nga mga pattern ug choreography, gipakita usab sa Basak San Nicolas ang ilang katakos sa kulturanong pagsayaw sa ilang kahapsay ug kahan-ay gikan sa sinugdanan hangtod sa kataposan sa presentasyon.
Ang ilang istorya mituyok sa kinabuhi sa mga karaang mag-uuma apan ang ilang simple ug malipayong pagpuyo naukay sa dihang usa ka miyembro sa ilang pamilya ang kalit lamang nga nasakit.
Bisan pa niini, diretsong misangpit ang pamilya ngadto sa Balaang Bata ug wala mosuway pag-adto sa albularyo.
“Daghan na kaayo mi og mga konsepto nga nasuwayan mao nga gusto mi nga mobalik gyud sa sinugdanan ug gigikanan,” sigon ni Navarro.
Miangkon sab si Navarro nga nabalaka sila nga di na mahinayon pa og apil sa contest kagahapon, Enero 12, sa Cebu City Sports Center tungod kay wala pa mahuman og buhat ang ilang mga costume.
Sa grand parade karong Enero 19, Dominggo, gikatakdang makigsangka ang Basak San Nicolas sa uban pang contingents sa kategoriya sa free interpretation.
Sa miaging tuig, mitapos sa ikaunom nga pwesto sa ritual showdown ang Basak sa Sinulog grand parade.
Gawas sa Basak, laing mananaog sa ritual showdown mao ang Banay Labangon (2nd); Banauan Cultural Group sa Barangay Guadalupe (3rd); Banay San Nicolas sa Barangay San Nicolas Proper (4th); Banay Budlaan sa Barangay Budlaan (5th); Pundok Maampoon sa Barangay Cambinocot (6th); ug Tribu Mabolokon sa Barangay Mabolo (7th).
Sa kategoriya sa street dancing, ikaduhang mananaog ang Labangon, sunod ang Banay San Nicolas, ikaupat ang Guadalupe samtang ang Cambinocot ang nakadaog sa fifth prize.
Sa musicality, ang Guadalupe (2nd); Labangon (3rd); Banay San Nicolas Proper (4th); ug Budlaan (5th). (RTF)