USA ka 38 anyos nga inahan ang wala na makagawas gikan sa Cebu City Jail (CCJ) sa Barangay Kalunasan human kini mobisita unta sa iyang kapuyo nga napriso sa kasong gidili nga drugas.
Si JO2 Bartolome Reasol sa CCJ nga nahinabi sa Superbalita Cebu niila sa babaye nga si Nimfa Cedenio, 38, taga Barangay Hipodromo, siyudad sa Sugbo.
Alas 11:00 sa buntag niadtong Dominggo, Enero 12, si Cedenio iya unta nga eskidyul sa pagbisita sa kapuyo apan nasakpan kini sa inspeksyon.
Gamit ang samin ug flashlight sa pag-inspeksyon sa mga bisita apil na kang Cedenio ug nasuta sa usa ka female jail officer nga duna gyud mi silaw sa kinatawo sa maong babaye hinungdan nga gipa- adto sa comfort room aron mapagawas kon unsa ning anaa sa iyang kinatawo.
Nakurat ang babaye nga jail officer sa nadiskobrihan nga ilang nakita dihang gihatag na ni Cedenio ang maong kontrabando.
“Wala mi magdahom, Sir, nga nasulod to sa iyang kinatawo. Giusa rato ha sa pagsulod. Gibutangan og scotch tape aron mopugong,” dugang ni Reasol.
Ang dinakpan sa pakighinabi sa taga Bureau of Jail Management and Penology BJMP) kaniya niangkon nga tungod sa kalisod nisugot nalang siya sa sugo sa iyang bana nga magpasulod sa maong shabu ug marijuana.
Gibanabana usab nga anaa sa P170 mil ang balor sa shabu samtang gibanabana nga moabot sa P24 mil ang kantidad sa marijuana.
Ang dinakpan dunay upat ka mga anak ug naproblema siya kon kinsa ang mag-atiman niini ilabi na nga siya ug ang iyang kapuyo pulos na nangapriso. (BBT)