TUNGOD sa dugay nang dumot sa managsilingan, patay ang managsuong lalake human gipamusil sa pulis sa Barangay Dumlog, dakbayan sa Talisay niadtong Sabado sa gabii, Enero 11.
Ang managsuong biktima mao sila si Joel, 35, ug Jerbes Cabrera, 30, mga molupyo sa naasoy nga dapit.
Gitudlo sa inahan sa mga biktima ang namusil mao ang ilang silingang pulis nga si PSSgt. Cidney Alisoso, kanhi sakop sa Talisay City Police Station ug kasamtangan nadestino sa Regional Drug Enforcement Unit (RDEU) sa Police Regional Office (PRO) 7.
Si Letecia Cabrera, 65, inahan sa mga biktima, nagkanayon nga nangahagba gawas sa ilang panimalay ang iyang duha ka mga anak human gitagsatagsa og pamusil sa pulis.
Matod sa inahan, siya ug iyang laing anak nga si Jonathan, manghud sa duha ka mga namatay, diha sulod sa balay.
Matod ni Jonathan, si Jerbes natulog sa ilang silingan ug gisulod og kalit ug gibitad sa pulis padulong sa gawas sa balay ug gipusil.
Niadtong higayona, ang maguwang nga si Joel natulog sud sa ilang balay, apan dihang nakamata ug nahibalo nga ang iyang manghud ang gipusil sa pulis, nidagan kini sa gawas aron pagtabang sa manghod. Apan giingong gipusil usab kini sa pulis.
Sumala ni Letecia ug ni Jonathan, si Alisoso uban sa iyang mga sakop sa litsonan nag-abot na sa barangay sa una tungod sa ilang reklamo sa kabaho sa tubig.
Ug niadtong Lunes, Enero 6, ang duha ka mga habig gihusay sa buhatan sa mayor sa siyudad sa Talisay.
Niadtong Sabado sa gabii, ang pulis nipasangil si Jerbes namato sa ilang balay.
Apan gibutyag usab ni Letecia ug Jonathan nga nagsugod ang away sa ilang pamilya ug ni Alisoso mga duha na katuig ang milabay.
Gawas sa bahin sa tubig, ikaduhang panag-away nila may kalambigitan sa koral nga maoy nag-uwang sa ilang balay.
“Sa una Sir, nag-abot nami sa barangay ana kabahin sa among giawayan unya gani niadtong Lunes lang ang akong anak nga babaye maoy nakig- atubang anang pulis sa mayor kay gipatawag naman siya ug kami,” dugang asoy sa inahan.
Ang pamilyang Cabrera lumad nga taga Jolo, Sulu sa Mindanao apan, ang inahan nga si Leticia maoy taga Sugbo ug niadtong 2010 nibalhin sila og puyo dinhi. Ang magtiayon dunay 12 ka mga anak nga didto tanan natawo sa Mindanao.
Si Leticia nangayo og hustisya sa kamatayon sa iyang duha ka mga anak.
Samtang sa testimonya sa pulis nga si Alisoso nga gipaabot sa Talisay City Police, matod ni Police MSgt. Reynaldo Tañica subay sa nahitabo nga insidente sa alas 10:20 niadtong Sabado sa gabii, naka dawat siya og tawag sa cellphone ug nagpaila nga siya si PSSgt.Sidney Alisoso, 32, ug sikit ra og pinuy-anan sa duha ka mga namgamatay.
Dugang ni Tañica nga si Alisoso, base sa iyang pagpahibawo ngadto na sa ilang buhatan, nangayo kini og back-up tungod kay gibato ang iyang balay.
Apan pag-abot sa mga pulis gikan sa Talisay City Police Station, diyes minutos na ang nilabay diin nahitabo ang pagpamusil sa duha ka mga biktima ug nangahagba na kini.
Dugang ni Tañica nga si Alisoso gidakop ug giimbargohan na og armas nga 9 mm Glock 17 nga isyu kaniya ug gigamit sa pagpamusil.
Mag-atubang ang maong pulis og duha ka ihap sa kasong murder.