SA LABING unang higayon sa mga unibersidad, gipahigayon sa Land Transportation Office (LTO) 7 ang E-Patrol Mobile Service sa Cebu Technological University - Main Campus sa M. J. Cuenco Ave., Cebu City.
Nagsugod kini niadtong Lunes, Enero 13 diin molungtad hangtod Enero 17, Biyernes.
Ang E-Patol Mobile Service nagdala sa E-Patrol Bus sa LTO sa mga dapit diin mamahimong makapahimulos sa nagkadaiyang serbisyo sa LTO ang publiko.
Matod ni LTO 7 Regional Director Victor Caindec nga mahimong makakuha og student permit, maka-renew og driver’s license, motor vehicle (MV) registration, ug maka-print og driver’s license nga lima ka tuig na ang validity pinaagi sa mobile service.
Mamahimo usab nga makapahimulos sa one stop shop sa online medical, drug testing, mobile emission, ug insurance via e-patrol.
Dugang ni Caindec nga susama ra og bayad ang pagkuha sa ilang serbisyo sa e-patrol ug sa ilang licensing offices.
Gihimo nila ning e-Patrol Mobile Service sa CTU aron makapahimulos ang mga tinun-an ug mga magtutudlo. Pwede usab ang walk-in niini.
Di ni ang unang higayon nga ilang gihimo ang e-Patrol tungod kay kapin 50 na ka mga local government units ug dapit ang ilang napahigayonan niini.
Anaa na usab sa kapin 28,000 ka mga indibidwal ang nakapahimulos niini.
Naabot na sila sa Pilar, sa mga isla sa Camotes; Canlaon sa Negros Oriental; Buenavista ug Carmen sa Bohol ug plano nila karong tuiga nga maabot sa Siquijor.
Nagsugod sila pagpakatap sa ilang e-Patrol bus niadtong Pebrero 2019. Unang nakapahimulos niini mao ang Panglao sa Bohol. (HBL)