Dili kini makapatay-og nga balita apan dako og epekto sa publiko.
Kabahin kini sa gisulat ni PJ Orias sa SunStar Cagayan de Oro mahitungod sa duha ka mga miyembro sa Roads and Traffic Administration.
Ang duha gipamulta og tag P500 tungod sa ilang pagpasagad og bilin og basura.
Matod ni Armen Cuenca, chief engineer sa City Local Environment and Natural Resources Office, gibilin sa duha ka RTA ang ilang basura sa sidewalk sa Kiosko Kagawasan sa Divisoria.
Tinuod, angay unta silang mahimong role model sa publiko apan nasipyat kay imbes magpasiugda sa kalimpiyo mao na may nagkalat sa ilang basura.
Kining gipakita sa Clenro makahatag og kadaseg sa komunidad. Magpasabot kana nga seryoso sila sa ilang kampaniya paggukod niadtong mga tawo nga naghugawhugaw sa atong siyudad.
Hinuon kining hitaboa tamparos sab sa liderato sa RTA tungod kay nasuta nga kuwang og disiplina kining duha niini ka mga sakop.
Hagiton nato ang RTA nga doblehon nila ang paningkamot dili lang sa pagpahapsay sa dagan sa trapiko apan pagbadlong niadtong hugawan sa publiko.
Busa angay magmatngon gyud ang publiko kay dili tiaw ang gihimong kampaniya karon sa gobiyerno batok sa pagpasagad og labay sa mga basura.
Ang programa sa pagpanglimyo nagkinahanglan og taas nga pagpailob. Kinahanglan nuntan gyud sa gobiyerno ang ilang kampaniya Dili sila molurang aron makab-ot nila ang kalamposan.
Ang problema usahay niining program mao ang kakuwang og trash bin o kining basurahan. Unta matag establisemento magpahimutang og basurahan sa ilang tugkaran.
Kodus niadtong nakadakop niining badlongon nga RTA personnel. Unta maghatag kini og dakong leksiyon sa tanan. Atong handom nga maghiusa ang publiko ug gobiyerno sa kampaniya batok sa basura aron mabulahan atong palibot ug makab-ot ang maayong panglawas.