GIOBSERBAHAN sa mga doktor sa tambalanan ang usa ka 19 anyos nga lalake nga gipusil ra sab sa iyang kaila.
Si Police Major Jhon Kareen Escober, hepe sa Pardo Police Station, niila sa biktima nga si Jasper Ochea, taga Barangay Tuyan, Dakbayan sa Naga.
Matod pa ni Escober nga gikan nag-inom si Ochaea sa balay sa iyang higala sa Barangay Kinasang-an, Dakbayan sa Sugbo.
Apan sa pag-uli mga ala 1:15 sa kaadlawon, giingong kalit lang gipusil sa gunman, kinsang ngan gipugngan una sa kapulisan.
“Didto raman sila nag inom sa balay sa iyang kaila. Unya mao to nga pag uli sa biktima, kalit lang nga gipusil,”matod ni Escober.
Sa imbestigasyon sa kapulisan, si Ochea nakaila ra sa mipusil kaniya sanglit giingong iya ra kining kauban sa inom.
Dugang pa sa imbestigasyon nga giingong usa sa kainom ni Ochea iyang nakalalis.
Mao usab kini ang mipusil kaniya human sa ilang pag inom.
Si Ochea naigo sa tangkugo ug dali nga gidala sa balay tambalanan.
Sa labing uwahing kasayuran nga nakuha sa mga pulis sa Pardo, si Ochea anaa pa gihapon sa ospital.
Gidugang ni Escober nga duna na silay persons of Interest apan wa pa una nganli samtang nagkuha pa sila og dugang impormasyon. (BBT)