GILUSAD ang Mangrove Nature Park sa Brgy. Tugbongan, lungsod sa Consolacion niadtong Biyernes Enero 10.
Ang mangrove nature park dunay gidak-on nga 1.5 nga ektarya nga communal fish pond ug adunay boardwalk nga gibana-banang moabot sa 300 metros. Gigahinan kini sa kagamhanan sa lungsod og P500,000.
Nangulo sa paglusad sila si Mayor Joannes “Joyjoy” Alegado ug Bise Mayor Teresa “Nene” Alegado ug mga konsehal.
Gipahibawo sa mga opisyal sa lungsod nga ang Tugbongan Brotherhood Fishermen’s Association o Tubfa maoy modumala sa mangrove nature park.
Gibutyag ni Bise Mayor Alegado nga ang park mamahimo unyang panginabuhian sa mga mananagat sa Tugbongan ug sa samang higayon umaabot usab nga tourist attraction sa lungsod. Ang lugar gisugdan na pag develop niadtong siya pa ang mayor sa lungsod.
Awhag karon sa bise mayor nga pabutangan og viewing deck ang lugar gumikan kay adunay mga migratory birds nga makit an sa nahisgotang dapit.
Dugang ni Alegado nga adunay 11 ka klase nga mangrove nga makita sa maong dapit.
Si Mayor Alegado, sa iyang bahin, nibutyag nga ang dapit nagpakita lang nga kanunay mopalambo ang kagamhanan alang sa turismo.
Iyang gihulagway ang naasoyng dapit nga talagsaon og talan-awon sa lungsod nga wa pa kaayo ma madiskobrehi.
“Mao ra kini ang mangrove park in an urban setting” matod ni Alegado.
Gitug-an sa mayor nga gipaubos na og mga seminar ang pipila ka mga lumolupyo sa barangay kalabot sa food preparation ug tourist guide seminar aron mas aduna silay kaalam sa pag-atiman sa mga dumuduong sa dapit. Way bayad ang ang dumuduong nga gustong mosuroy sa dapit.
Gipahinumdoman sa mayor ang mga taga Tugbongan kalabot sa ilang responsibilidad aron mapreserbar ang dapit sama sa pagmentinar sa kalimpyo sa palibot aron dili maguba ang kinaiyahan. (GCM)