DUNAY igong basehan ang Lapu-Lapu City government sa kamanduan sa pagpasira sa usa sa dakong buwangan sa Lapu-Lapu ang Mahayahay Cockpit II sa Barangay Gun-ob.
Gisalikway ni Mayor Junard Chan ang giingong adunay pamolitika ang closure order ilabi na nga ang nag-operate sa maong buwangan mao man ang manghod ni kanhi mayor ug congressman Arturo Radaza nga si Vic Radaza.
Nasuta nga kapin sa 15 ka tuig nga nag-operate ang buwangan apan wa kini Contract/Agreeming tali sa tag-iya sa building nga T.S. Paulin & Sons ug Vic Radaza nga mi-abang sa maong establisemento, Building ug Occupancy Permit ingon man Fire and Safety Inspection Certificate gikan sa Bureau of Fire Protection (BFP)
Niadtong Enero 9, hingpit gipatuman sa city hall ang maong closure order sa maong establisemento.
Gipahibawo ni Chan atol sa gipatawag nga press conference kagahapon, Enero 13, nga adunay business permit ang operasyon sa sabongan apan kuwang ang dokumento niini ilabi na ang sanitary permit nga pre-requisite kini sa dili pa ka-isyuhan og business permit.
Sumala sa mayor nga gipadad-an nila og notice ang operator sa pag-comply sa mga dokomento sud sa 30 ka adlaw ug mibayad kini og P300 niadtong Disyembre 19, 2019 alang sa pag-isyu sa sanitary permit.
Apan pakyas sa pagkuha sa ubang dokumento ug naabtan sa pagkapupos sa gihatag nga tagal hinungdan nga hingpit gyud nga napasira.
Nagkanayon si Chan nga sa higayon nga makompleto ang maong requirements makabalik og operate ang maong buwangan.
“Wa ni sagul pamolitika atoa, kay kon namolitika pa ko niadtong paglingkod nako pagka-July 2019 pa ni sila nasirha. Nakapa-derby pa gud ni sila (kadaghan),” tipik sa pamahayag ni Chan. (FVQ)