PAGDEPENSA lang sa kaugalingon ang gihimo sa pulis nga nipusil-patay sa magsuong Cabrera sa Barangay Dumlog, dakbayan sa Talisay niadtong Sabado sa gabii, Enero 11.
Mao kini ang pangangkon ni Police Staff Sergeant Sidney Alisoso ngadto sa mga pulis sa Talisay City Police Station.
Si Alisoso gitanggong na sa Talisay detention cell, human usab siya nitahan ra dayon sa iyang kaugalingon ug gipasakaan na usab og kasong duha ka ihap sa murder kagahapon sa buntag, Enero 13.
Matud ni Police Major Gerard Ace Pelare, hepe sa kapulisan sa Talisay, nga sa pamahayag ni Alisoso sa gihimo nga pakisusi, nga igo ra siya unta niya nga panakpon ang magsuon nga namato sa ilang balay.
Gani nanawag siya og pulis gikan sa Talisay City Police Office (TCPS) sa pag-report sa maong alarma sa pagpamato.
Dugang ni Pelare nga paghulagway ni Alisoso sa duha, nga mga hubog kini.
Igo lang unta niya nga gikompronta ug sikupon tungod sa pagpamato, apan giingon nga si Jerbes ang agresibong nanulti og bati nga pulong batok sa pulis, dayon kuha og bolo gikan sa iyang likud dayon tigbas kang Alisoso.
Si Alisoso ang naigo ug nasamdan sa iyang walang kamot, diha pa matud pa nibunot sa iyang armas ang pulis agig pagdepensa sa iyang kaugalingon.
Dugang alegasyon ni Alisoso nga namusil usab og kalit kaniya ang magulang nga si Joel, apan wala kaigo, dinhi usab siya nibalos nga niresulta gyud sa kamatayon sa managsuong Jerbes ug Joel Cabrera.
Ang kapulisan ang nangita pa hinuon og saksi nga momatuod sa alegasyon sa pulis ug sa alegasyon sa kabanay sa mga biktima.
Sa pangangkon usab inahan ug igsuon sa mga biktima nga nangatulog lang ang duha, sa dihang gibitad pagawas si Jerbes ug nga igo ra usab nitabang sa iyang manghud si Joel.
Si Alisoso ang nitahan ra sa mga pulis atol sa pag-responde sa Talisay Police nianang Sabado sa gabii diin lakip sa iyang gitahan ang issued firearm nga 9mm calibre, nga maoy gigamit niini sa pagpamusil.
Samtang na-recover pa sa mga pulis ang usa ka bolo o sundang nga nagkadugo pa ug 45 kalibre sa armas nga adunay upat ka mga bala.
Matud ni Pelare nga lakip pa sa ilang gisusi kon ang duha ka hinagiban nga nasakmit ang iya ba tinuod sa mga biktima.
Dugang ni Pelare nga gawas sa kanunay na nga nahimong’ lalis tungod sa kabaho sa tubig ug sa koral diha sa panimay, wala nay lain pang natala nga mga bati nga record batok sa Cabrera brothers ug Alisoso.
Hinuon nakadawat og mga taho gikan sa ubang mga molupyo diha sa Dumlog nga ang duha ka magsuong Cabrera, ang gihulagway nga ‘maldito’ sa ilang lugar.
“Apan wala tay record gyud ani nila nga gireklamo, sa police station ug sa barangay, estorya ra sad na sa mga residente sa lugar. Case-closed na ni kasuha kay napasaka na sab ang kaso,” saysay ni Pelare sa Superbalita Cebu. (FMD)