HUGOT karon ang monitoring sa kapulisan sa Central Visayas sa posibling pagsulod sa party drugs sa dakbayan Sugbo nunot sa insidente sa miaging tuig nga adunay babaying tinun-an ang nakalas tungod sa overdose sa ecstacy.
Kung adunay mga street party nga mahitabo makig alayon ang kapulisan sa organizers aron mapadalhan silag K9 units nga mosusi sa mga tawo nga mosulod sa venue ug papugngan ang pagsulod sa party drugs.
Matod ni Police Brigadier General Valeriano de Leon hepe sa Police Regional Office (PRO) 7 nga wala pa hinuon sila makadawat og kasayuran nga aduna nay daghang ecstacy nga nangabot sa siyudad sa sugbo alang sa kalihukan sa sinulog.
Apan wala sila mokompyan nga tungod niini ang tanang intelligence personnel sa PRO-7 ang gipalihok na.
Dili ika limod nga ang Sugbo maoy ikaduha sa Metro Manila diin ang mga kalihukan sama sa Sinulog dayohon sa mga lokal ug langyaw nga mga turista.
Sama sa kaulohan daghan ang mga batan-on sa Sugbo nga adunay kaya sa kinabuhi ang manggawas ug mag lipay-lipay nga angayang bantayan tungod sa posibling pagkatap sa party drugs.
“Gagawa tayo ng kaparaanan we will deploy probably mga K9 wala dapat mag pasok na drugs,” matod ni General Valeriano de Leon.
Iyang giklaro nga kinahanglan nga adunay request sa organizers nga butangan sila'g police personnel nga mobantay gawas sa mo susi sa entrance nga bahin sa party.
Sa miaging semana, ang kapulisan sa kaulohan naka sakmit og liquid tablets ecstacy apan wala pa masayod ang kapulisan kung duna sa Sugbo sa maong supply. (AYB)