Tabang alang sa maapektuhan sa kagubot sa Iran-US gi-andam

GIPANGANDAMAN karon sa lokal nga kagamhanan sa siyudad ang posibilidad nga dunay Kagay-anon nga Overseas Filipino Worker (OFW) nga apektado sa kagubot tali sa nasud sa Iran ug sa United States of America (USA).

Gibutyag sa City Administrator Teodoro Sabuga-a nga gimando na niini nga makigkoordinar ang Public Employment Service Office (PESO) diha sa buhatan sa Overseas Workers Welfare Administration (OWWA) kung dunay mga Kagay-anon nga posibleng malakip sa mandatory repatriation o sa pagpapauli sa mga apektadong Pinoy sa nahisgutang kagubot.

“Hibalo nga grabe ang tension karon sa Iran ug US dili nata maghulat nga naa ba diay taga Cagayan didto,” matud ni Sabuga-a.

Gidugang pa niini nga mentras layo pa maplano na daan kung unsay matabang sa lokal nga kagamhanan ilabi na nga kung positibong dunay taga Cagayan de Oro ang apektado.

“Makuha ta na daan ang profile unsay status ani unsa bay posible nga matabangan kay ang DOLE naa man sila emergency nga mahatag pero ang ato diha unsa ang sustainability,” dugang niini.

Gikabutyag usab nga kung mahimo ila kining mapasulod sa usa ka kompanya ug makapangayo og special request aron mahatagan og temporaryong trabaho ilabi na kung buot pa usab niini nga mobalik panahon nga mohupa na ang kagubot.

“Para bisan temporary lang kay once mahupa na dili man nimo mabut-an mobalik man gyud na kung interesado sila,” dugang niini.