GISUSI na karon sa Land Transportation Franchising and Regulatory Board (LTFRB) 7 ang giingong pagsaka sa plite sa Angkas human sila mi-update sa ilang application.
Aduna’y mga pasahero nga nakamatikod nga nisaka og P10 ang plitehan nila sa naandan nila nga rota.
Mas lisod usab nga gamiton ang app karon itandi sa karaan nga application niini.
Ang Angkas sa ilang bahin nihimo usab og pakisusi kabahin niini.
“There have been reports of fare fluctuations, both up and down, in Cebu and we are currently looking into it,” matod ni Angkas head of operations, David Medrana.
Giklaro usab ni Medrana nga wala’y kalambigitan sa traffic subay sa selebrasyon sa Sinulog ang maong insidente. “We just want to clarify that this has nothing to do with Sinulog.”
Ang Angkas ni-update sa ilang application niadtong Enero 12, Dominggo diin gipaubos nila kini sa preventive maintenance.
Samtang ang LTFRB 7 sa ilang bahin nagkanayon nga mohimo sila og report niini ug isumiter sa ilahang ulohang buhatan.
Base sa pilot study nga nauyonan sa gobyerno, ang LTFRB ug ang Land Transportation Office ang mihimo sa joint monitoring niining transport network vehicle service (TNVS).
Gibutyag ni LTFRB 7 Regional Director Eduardo Montealto Jr. nga kon mapamatud-an nga nakalapas ang Angkas niining lagda o kon nag-overcharge ni, pahamtangan kini og multa nga P5,000 sa unang offense; P10,000 sa ikaduhang offense; ug P15,000 sa ikatulong higayon ug posibleng ipaubos sa suspensyon ang certificate of public convenience niini sulod sa usa ka buwan o kaha bawion kini.
Kini subay sa Joint Administrative Order No. 2014-01 sa LTO ug LTFRB.
Anaa lang sa P20 ang plete sa Angkas sa unang kilometro niini ug anaa sa P16-P20 sa mosunod nga kilometro.
Anaa usab sa 1.5x ang price surge amount niini.
Usa si Rodel Montebon, kinsa usa ka avid user sa Angkas nga nakamatikod niining pagsaka sa plitehan sa Angkas.
Matod niya nga kon kaniadto P26 ra ang plete gikan sa ilang panimalay paingon sa laundry shop duol sa ilaha sa Barangay Apas, karon moabot na kini sa P36.
Mas lisod usab gamiton ang app karon tungod kay dili ensakto ang location nga i-detect niini.
Usa sa update nga gihimo sa Angkas kining pagbutang og weight o timbang sa pasahero nga daw usa ka lagda nga gusto sa gobyerno.