GIPATUMAN ni Mayor Edgardo Labella ang moratorium kun temporaryong paghunong sa pag-clamp ug pag-tow sa mga sakyanan, apil ang motorsiklo, sugod kagahapon Enero 13, hangtod Enero 19, sa Sinulog Grand Parade sa tibuok dakbayan sa Sugbo.
Ang mayor niingon nga iyang nahukman nga temporaryong pagsuspenso sa clamping ug towing sa tibuok dakbayan gumikan sa hangyo sa katawhan, panawagan sa social media ug komentaryo usab ni Superbalita Cebu columnist ug broadcaster Bobby Nalzaro.
Sukad nagsugod ang nobernaryo sa kapistahan ni Sr. Santo Niño, mokabat na sa 335 ka four-wheeled nga mga sakyanan ang na-clamp.
Apan giklaro ni Labella nga kon ang sakyanan nakababag na sa trapiko ug bul-og sa katawhan, i-clamp ug guruyon gihapon kini.
Suspendido ang clamping ug towing gikan alas 10 sa gabii hangtod alas 7 sa buntag para mahatagan og panahon ang mga deboto ni Snr. Sto Niño nga makaparada sa ilang sakyanan sa dapit diin gitugot ang pag-park.
Parking area
Ang City Government nitagana sa espasyo duol sa Compaña Maritima nga naa sa likod sa city hall, kilid sa Senior Citizen’s Park, isip parking area.
Kon di paigo ang lugar sa mga sakyanan, ang mga deboto giabisohan nga adto mo-park sa SM City Cebu alang sa mga taga north ug SM Seaside City alang sa mga taga south.
Si Labella nakig-alayon sa management sa duha ka mall ug nitugot na nga ablihan ang ilang mga parking space sugod alas 4 sa kadlawon.
Di angay mabalaka ang mga car owner sanglit adunay mga My Bus nga mohatod ug mokuha sa mga deboto gikan ug paingon sa Basilica nga libre.
Gihatagan na usab og direktiba ni Labella si June Maratas, pangulo sa Department of General Services (DGS), sa pag-andam sa aircon buses sa higayon nga magkuwang ang My Bus.
Base sa record sa officer-in-charge sa Cebu City Transportation Office (CCTO) nga si Alma Barandog-Casimero, niabot na og 335 ka mga sakyanan ang na-clamp ug 69 ka motorsiklo ang na-tow gikan sa Enero 9, pagsugod sa novena sa Basilica, hangtod alas 3 kagahapon sa hapon, Enero 13.
Si Labella nagkanayon nga inig lapas sa alas 7 sa buntag, ang CCTO mobalik na og clamp sa mga sakyanan nga ipataka lang og park bisan adunay mga no-parking ug no stopping signs.
Ang mayor niingon nga adunay mga CCTO personnel nga ibutang sa mga busy street nga mobadlong sa mga nagmaneho og sakyanan para mapahiluna ang ilang pag-park ug magiyahan paingon sa SM parking space.
Ang Cebu City Ordinance Number 1664 maoy nagsilot sa day ug overnight illegal parking ug CO 1657 kun Clamping Ordinance.