NADANI ang atong atensyon sa maong pangutana tungod sa pagkomentaryo sa atong usa ka higala nga tua sa Amerika nga 455 ka tuig na ang Pista Senyor.
Naa say usa ka lecture karong hapon diha sa Palm Grass Hotel kabahin sa posibilidad nga ang Sinulog nagsugod sa Sulu empire sa wa pa moabot ang mga Katsila?
Nangutana ako sa maong higala kon siguro ba siya sa maong numero kay gitumbok niya nga 1565 diay ang unang pagsaulog sa Pista ni Senyor Sto. Niño dinhi sa Sugbo kon mao man gani. Apan sa tubag, akong masabot nga dili sab siya sigurado.
Sa atong nahibaw-an sa kasaysayan man gud, ang tuig 1565 mao ang pag-abot sa Spanish expedition ni Juan Miguel Lopez de Legaspi.
Sa libro ni Resil B. Mojares nga “The Feast of Santo Niño,” iyang gisulat nga nahibulong kining si Legaspi nga wala masunog ang maong imahen diha sa usa ka balay sa San Nicolas.
Dihang nakit-an sa mga Katsila, ila kining gidala diha sa ilang galleon. Apan paglabay sa 17 ka adlaw o sa Mayo 15, 1565, nagpahigayon ang mga Katsila og usa ka Holy Procession diin ilang gidala ang balaang imahen gikan sa baybayon padulong sa usa ka temporaryong kapilya.
Matod pa, dunay mga 30 ka lumad nga nitan-aw sa maong kasaulogan kay gusto silang makuha sa pagbalik ang maong imahen. Apan nangangha sila sa gihatag nga pagdayeg ug pag-ampo sa mga Katsila sa imahen sa Balaang Bata.
Giasoy ni Mojares nga giisip nilang Legaspi nga mao kini ang unang pista ni Senyor Santo Niño.
Atong hisgutan sa sunod lindog nganong nahimong Enero ang Pista Senyor. Apan sa pagkakaron, atong balikan og asoy kining maong Balaang Imahen dala ni Ferdinand Magellan sa Abril 1521.
Iya kining gihatag isip gasa kang Rayna Juana, ang numero unong asawa ni Rajah Humabon, sa bunyag niini pag Abril 14, 1521. Nakaingon ko nga numero uno kay daghan baya og asawa ang hari sa Sugbo niadtong panahona.
Kining maong bunyag ug paggasa sa Balaang Imahen maoy giisip karon nga sugod sa pagkahimong Kristiyano sa Sugbo, sa tibuok Pilipinas, ug sa tibuok South East Asia. Di kini mao ang unang pista.
Wa kaayo maapil sa kasagarang pag-asoy sa atong Kaagi isip Sugboanon nga human namatay si Magellan sa mga kamot ni LapuLapu, gihiloan ug gipamatay sab ni Humabon ang nahabiling mga Katsila.
Ang nahabilin kay nasulod na lang sa usa ka barko ubos sa liderato ni Sebastian Elcano nga nabalik sa España.
Sud sa 30 ka tuig nga nahabilin sa Sugbo ang Imahen sa Senyor, giampoan kini sa mga lumad nga usa sa mga Ginuo. Alang kanila, ang Balaang Imahen milagruso ug giampoan pinaagi sa sayaw nga Sinulog.
Karong hapon, motambong kita sa forum nga motuki sa tinubdan sa sayaw nga Sinulog. @anol_cebu sa Twitter