PARKING. Ang mga nanimba sa buntag sa simbahan sa Sto. Niño atol sa nobenaryo sa Pista Senyor mireklamo nga ang ilang mga sakyanan naklaman o nagwarnihan sa taga City Transportation and Traffic Office (CTTO) sa dakbayan sa Sugbo nga ilang giparking sa kilid sa dalan.
Kon giparking ang sakyanan sa mga nanimba sa Sto. Niño sa kilid sa dalan nga gidili ang parking, di nato mabasol ang traffic enforcers nga igo ra nagpatuman sa balaod kon city ordinance. Ang problema sa simbahan kay limitado ang parking. Tinuod sakit sa bulsa ang multa kay P1,500 man.
Dunay mga opinyon o suhestyon nga lugwayan usa ang pagpanakop o clamp sa mga sakyanan nga moparking kilid sa dalan duol sa simbahan sa Señor Santo Niño tungod sa nobenaryo matag buntag ug kada adlaw nga misa tungod sa nagsingabot nga pista.
Mahimo man tingali nga lugwayan ang pagpanakop sa mga sakyanan nga nag-illegal parking apan nagkinahanglan kini og orden gikan ni Mayor Edgar Labella o di ba pinaagi sa resolusyon gikan sa konseho nga di sa tiketan o warningan ang mga sakyanan nga ang tag-iya nanimba sa Sto. Niño ug nagparking sa gidili nga dapit ning panahon sa Pista Senyor.
Ang laing solusyon sa mga dunay sakyanan nga manimba sa Sto. Niño apan walay ilang tsuper mao ang pagsakay og public transport sama sa taxi o di ba Grab. Dinhi, di lang makalibre ang tag-iya sa multa sa illegal parking, makatabang pa gyud sa pagminus sa mga sakyanan nga moparking sa kilid sa dalan.
Di ni minaut nga storya, apan walay igo nga rason nga moreklamo sa dakbayan o ni Mayor Labella kadtong mga tag-iya sa sakyanan nga natiketan o naklaman tungod kay nakahibawo man sila nga ang ilang giparkingan dako kaayo og marka nga “No Parking.”
Kanang mga dapit nga gidili ang pagparking sa mga sakyanan dunay mga hinungdan. Wa na gibutang ang maong karatola nga usa ka dekorasyon. Gibutang na siya sa maong dapit tungod kay duol sa eskina, dunay “fire hydrant” ug uban pa. Ang katuyoan sa “no parking” alang man sa tanan, may sakyanan o wala.
•••
WAY KLARO. Kining akong personal nga kasinatian nga di maayo ngan nga usa ka naghupot og credit card akong ipaambit ninyo aron makabantay sad mo sa ilang dili maayong pamaagi sa pagpadala sa billing. Maayo gani kay nakahibawo nako daan sa due date sa akong bill sa Bankard nga matag petsa 9 sa buwan.
Bisan wa pa moabot ang akong bill, miadto na lang ko sa banko niadtong Enero 9 ug nangutana sa akong bayronon. Mibayad ko nga wala koy ideya unsay akong napalit gamit ang Mastercard sa RCBC Bankard kay di ko gusto nga makabayad sa ilang surcharges nga dili komedya ang rate.