ANG motorcyle with side car o kining pedicab dugay na nga matang sa transportasyon labi na didto sa kalungsuran og sa probinsiya o bisan sa mga third class nga mga siyudad. Sama na lang dinhi sa Metro Cebu daghang nag-operate nga mga pedicab sa Mandaue City, Talisay City, Lapu-Lapu City nga anaa gyud magdagan o mamasahero sa kinapusuran sa dakbayan. Mismo dinhi sa dakbayan sa Sugbo adunay mga pedicab apan atoa ra mamasahero sa mga suok-suok o sa mga barangay og subdivisions.
Aduna man hani mga trisikad o kanang biseklita nga pasaheroan usa nga gitugan nga maka-operate ning moang mga lugar. Apan karon morag gamay na lang kay medyo kapoy man ang maong sakyanan sa nagmaniho gumikan kay tindak man unya daghan ang mga pasahero. Gilabwan na usab sila karon sa mga motorcycle for hire o kining habal-habal ug Angkas. Gi-regulate ang mga pedicab operation pinaagi sa local government unit nga maoy mo-isyo og franchise pinaagi sa Tricycle Regulatory Board apil ang ilang plitihan.
Legal ang operasyon sa tricycle dili sama sa habal-habal nga illegal. Apan karong bag-o, mipagawas og kamanduan ang Department of Interior and Local Government (DILG) ngadto sa mga mayor og kalungsuran nga did-an na ang mga pedicabs nga maka-agi sa national highway. Kini gumikan gihapon sa siguridad. Kay matod pa sa DILG nga delikado nga paagion kining maong matang sa transportasyon sa mga national highways nga naa ang mga dagkong sakyanan nga nangagi.
Makahimo kaha sa pagsunod ang nga local offcials labi pa ang mayor ning maong kamanduan? Kon did-an ang mga tricycle nga maagi sa national highways, asa man intawon nila paagion labi pa didto sa probinsiya? Adto sa bukid o mamidpid sa baybayon labi pa kon walay alternatibo nga agianan.
Pero ang volume sa pasahero naa sa highway. Impractical ang kamanduan. Ambot may pulitikong mosunod ini, kontrahan sila sa pedicab drivers ug mga pasahero. (bobbygnalzaro@gmail.com)