MAPASIGARBUHON kita sa taho nga mosaksi si Presidente Rodrigo Duterte (PRRD) sa Sinulog Festival karong Dominggo, Enero 19, sa Cebu City Sports Center.
Malipayon kita ang presidente kinsa adunay kagikan nga Sugbuanon moduyog sa kapistahan ni Señor Sto. Niño, ang timaan sa pag-abot sa Kristiyanismo sa Asya.
Isip labing taas nga opisyal sa nasod, ang iyang presensiya sa Sinulog dakong risgo. Labad sa ulo sa mga awtoridad sa paglatid sa mas higpit nga plano alang sa iyang seguridad.
Ug tungod sa kaestrikto unya sa kalihokan, mapagan ang publiko nga dili bastabasta makasulod sa dapit diin naa ang presidente o posibling kalit nga kausaban sa dagan sa kalihokan sa pagkonsiderar sa presensiya sa labing importanteng tawo sa nasod nga mosaksi sa kaalegre sa presentasyon sa Sinulog.
Hinuon, dili kini unang higayon nga ang usa ka presidente sa nasod nitan-aw sa Sinulog Festival. Nag-una ang mga kanhi Presidente nga sila si Fidel Ramos ug Benigno Aquino III ug malampuson ang ilang pagbisita taliwala sa bagang duot katawhan.
Apan lahi ang personahe sa mga nahisgotang lider kon intade sa mas isog nga si Duterte. Daghang kining naligsan sa iyang kontrobersyal nga gubat sa gidiling drugas, korapsiyon, mga kaatbang sa pulitika ug uban pa. Dugang hulga mao ang internasyonal nga terorismo.
Manghinaut kita nga ubos sa lantip nga plano sa seguridad ni Duterte, nisalig usab kita sa pagpanalipod sa milagrusong Sto. Niño sa Sugbo atol sa pagpabisita sa atong kadugo nga Bisaya nga presidente.
Sa makausa pa, gikinahanglan ang suporta sa yanong katawhan sa mga paningkamot sa awtoridad sa pagmintinar sa kahusay ug kalinaw.
Magbaton kita og taas nga pasensiya sa mga imitasyon. Motaho sa awtoridad sa mamatikda nga dautang lihok sa pipila ka tawo ug grupo sa palibot o komunidiad. Pit Senyor!