UNANG adlaw sa klase, liwas sa Pasko. human napupos ang Christmas vacation. Gi-tinagurha ug gi-tinagutlo paglakang ni Dadong ang mga ang-ang sa hagdanan sa ilang eskuylahan padung sa ilang klasrum nga diha sa third floor mahimutang. Nagdali siya sa pagtuong na-leyt na siya kay alas utso na man sa buntag. Apan naabtan niya sa ibabaw ang iyang mga higala ug mga klasmeyt sa Grade 10 nga nanagtabi bahin sa mga halandumong mga hitabo sa ilang Christmas vacation.
“Aylag dali-dali, Bay Dadong. Wa pa moabot si Ma’m Aulinata,” matod ni Tatung nga nagngisi.
“Wa pa diay?” ni Dadong nga nakangisi sa pagpasalamat.
“Wa pa. Diin kahang dapita to siya nag-bakasyon ning Paskuha?” ni Lalong. Gipasayaw-sayaw niya ang iyang mga kamot, mora bag wa kahutdi sa iyang kalipay ug energy sa milabayng Pasko ug Bag-ong Tuig.
“Ikaw, Long, diin ka dapita nag-christmas vacation?” matod ni Tatong nga nag-ayo-ayo sa liston sa iyang sapatos kay bag-o mang pinalit aron pagpatuod ini sa iyang mga klasmeyt.
“Baguio City ra ko, Bay. Sapaw god kog tulo ka brip!” Mingisig hilaw si Lalong.
“Pwerting tugnawa diay?” ni Tatong nga mibahakhak.
“Ikaw, Tong, diin ka man mag-christmas vacation?” sukot ni Lalong. Nagpapha sa lubot sa iyang karsones nga maong, kay orig 501 Levis man. “Ah, daghan kag nakit-ang sexy stars, Tong?”
“Molang!” Nagyango-yango nga nagdiwalwal-diwalwal sa iyang dila.
“Kinsa ang mga sexy stars, Tong?” ni Lalong. Gihunghungan siya ni Tatong.
“Bayot ka! Puro man god na mga sexy star nga lalake imong ginganlan!” nahikurat si Lalong. Pwerting bahakhak ni Tatong.
“Ikaw, Dadong, diin man ka dapita nag-christmas vacation?” nagkadungan og pangutana sila Lalong ug Tatong.
“Sa U.S.A., Bay!” tubag ni Dadong dungan ang pagtan-aw ug paghapuhap sa panit sa iyang bukton.
“Ngiga god! Sa U.S.A. gyud ka nag-christmas vacation, Dadong?” matod ni Ma’m Aulinata nga mao pa gyuy pag-abot sa ibabaw sa hagdanan. “Moputi ta kag samot kay tugnaw god kaayo didto sa United States of America!” Wa siya makatuo.
“Bitaw, Dadong, tinuod ka?” matod nilang Tatong ug Lalong.
“Di man god U.S.A. nga United States of America...” ni Dadong.
“Unsa man diay?” nagdungan sila Tatong, Lalong ug Ma’m Aulinata. “U.S.A. Umahan Sa Argao!” tug-an ni Dadong.
Nangatawa sila si Tatong, Lalong ug ang ilang maestra.
(Katapusan)