ANG kanhi world boxing champion nga si Victorio “Vicious” Saludar sa Polomolok, South Cotabato maoy napiling “Boxer of the Month” sa bulan sa Disyembre 2019 sa Mindanao Professional Boxing Association (MinProBA).
Nakuha sa 29-anyos nga Saludar ang maong prestisyusong award human sa dihang iyang gi-knockout si Mike Kinaadman sa Iligan City sa ikaunom nga round niadtong Disyembre 21 sa Enan Chiong Activity Center sa Naga City, Cebu.
Ang kanhi WBO minimumweight titlist aduna na karoy record nga 20-4, 11 KOs. Iyang nabuhian ang titulo human siya mapukan ni Wilfredo Mendez sa Puerto Rico pinaagi sa unanimous decision sa niaging Agusto 24 sa Puerto Rico.
Nalangkat niya ang kapiyonato sa Hulyo 13, 2018 human niya mabuntog si Ryuya Yamanaka sa Japan.
Iyaha kining nadepensaan sa niaging Pebrero batok sa laing hapon nga si Masataka Taniguchi sa Korakuen Hall, Japan. (JBM)