SULOD man tuod sa duha ka mga buwan nga wala siya nakaduwa apan gipakita ni Kyrie Irving nga wala matay-i ang iyang abilidad ug nagpakatap kini’g 21 puntos sa iyang pagbalik aron tabangan ang hosts Brooklyn Nets sa pag-ihaw sa Atlanta Hawks, 108-86, kagahapon sa National Basketball Association (NBA).
Ang nakapangangha pa, napupo ni Irving ang iyang mga puntos pinaagi sa 10-of-11 shooting ug iya kining nahimo sulod lang sa 20 ka mga minutos nga pagduwa.
“I mean, I’m not going to shoot 10 for 11. I hope I can shoot 10 for 11 every night,” matod ni Irving, kinsa sulod sa 26 ka mga duwa nga wala nakapakita og aksyon gumikan sa pagkaangol sa iyang tuo nga abaga.
Sa iyang pagbalik, daw wala ra’y nahitabo kang Irving ug kon buot hunahunaon, mas migrabe hinuon ka maayo ang abilidad niini gumikan kay mirehistro kini og career-best nga 90.9 shooting percentage.
Tatawng nadasig sa pagbalik ni Irving, ang Nets nakaposte og 39 puntos nga labaw ug mipugnit sa ikaduha nilang sunodsunod nga kadaugan human sila nakatilaw og pito ka mga sagunson nga kapildihan.
Ang Nets mingsaka sa 18-20 nga rekord samtang ang Hawks nasukamod sa 8-32 nga naraha nga maoy labing ubos sa Western Conference.
“We had a certain confidence about us tonight that I think we were missing during that streak,” asoy ni Nets coach Kenny Atkinson. “So great, great timing having him back.”
Si Taurean Prince nidugang og 14 puntos alang Nets, ning-amot og 13 puntos matag usa sila si DeAndre Jordan ug Caris Levert, nihatag og 11 puntos si Joe Harris samtang nitampo og 10 puntos si Jarrett Allen.
Ang Hawks, nga ningkombati nga wala ang usa sa ilang labing sinaligan nga si Trae Young, gipangulohan ni Cam Reddish pinaagi sa iyang 20 puntos, nihatag og 12 puntos si DeAndre Bembry samtang niamot og 10 puntos si Alex Len.
Ang kanhi magduduwa sa Nets nga si Vince Carter nitampo og walo ka mga puntos alang sa Hawks.
“Obviously to come back here, and some of the other stops I’ve played for, and just kind of to receive a standing O for one last time is just great,” batbat ni Carter.
Sa pagsugod pa lang sa kombati, ang Nets ningpasutoy na sa ilang opensa ug nakaposte sila’g 70-46 nga labaw sa halftime.
Sa laing mga duwa, ningdaog ang Utah Jazz batok Washington Wizards, 127-116, San Antonio Spurs batok Toronto Raptors, 105-104, Denver Nuggets batok Los Angeles Clippers, 114-104, Phoenix Suns batok Charlotte Hornets, 100-92, ug Memphis Grizzlies batok Golden State Warriors, 122-102, ug New York Knicks batok Miami Heat, 124-121. (AP, ESL)