DAGHANG nakugang niining wala paglakip sa Sugboanong si June Mar Fajardo sa lineup sa Gilas Pilipinas alang sa Fiba Asia Cup qualifiers.
Kini human nga gipagawas sa Samahang Basketbol ng Pilipinas (SBP) sa niaging semana ang 24 ka mga pangalan sa molangkob sa national squad.
Ang nalista mao ang mga rookie nga napili sa special Gilas draft sa niaging buwan nga sila si Isaac Go, Rey Suerte, managsuong Matt ug Mike Nieto ug Allyn Bulanadi.
Gidugang sa mga bag-o ma sila si Thirdy Ravena, Kobe Paras ug laing Fil-Am nga si Dwight Ramos, Dave Ildefonso ug Javi Gomez De Liano.
Ang mga PBA players nga mokompleto sa pool mao sila si Christian Standhardinger, Poy Erram, Roger Pogoy, Ray Parks, Kiefer Ravena,Japeth Aguilar, Christian Standhardinger, CJ Perez, Mac Belo, Matthew Wright, Troy Rosario ug Marc Pingris.
Kining 24 nga nalista, anhi dinhi kuhaa ang 12 nga maoy moduwa sa matag window sa qualifying rounds.
Kay wala man sa listahan si Fajardo, natural dili gyud siya makaduwa.
Apan sa dihang gisugat og negatibong reaksyon ug pagsaway, ang SBP daling mipasabot kon nganong wala sa listahan ang five-time MVP awardee nga si Fajardo, kinsa beterano na sa Gilas.
Matod pa ni SBP President Al Panlilio nga apil gihapon diay si Fajardo sa programa sa Gilas Pilipinas apan gusto lang nila nga hatagan og igong panahon nga makapahuway ang 6-10 nga Sugboanon.
“Fajardo remains to be a big part of the future for the Gilas program. He will in fact be at his peak form when the World Cup 2023 comes along. We will need his dominance and his international experience, and we assure all his supporters that they will see Fajardo wearing a Gilas jersey in the near future,” matod ni Panlilio.
Kon atong basehan ang rason ni Panlilio, mahimo pa diay nga mausab ang 24 nga anaa sa national pool ug kini posibli nilang buhaton aron pag-accomodate unya ni Fajardo.
Ilang gilantawan nga tungod sa hataas nga pagpahuway niini, sa 2023 haom ug anaa na sa saktong kapiskay ang panglawas sa lumad nga taga Pinamungajan, Cebu.
Kon mao ni programa sa SBP, mora man og kiwang paminawon. Unsaon man pagsinati unya ni Fajardo ang iyang mga kauban kon sa uwahing bahin ra siya gamiton sa Gilas, ilabi ra ba nga mga rookie players ang kadaghanan niini.
Dili ba kinahanglan man gyud unta nga magkauban ug magkakuyoy-kuyog sulod sa hataas nga panahon ang molangkob sa team aron magka-teamwork?
Kon atong sabton, daw og gibutang lang si Fajardo sa reserved list ning sitwasyona. Mora og maghuwat lang og kinsa ang ma-injured aron siya makakuha og slot.
Sa sunod buwan mosugod na ang first window sa 2021 Fiba Asia Cup qualifiers apan hangtod karon wa pa gani sila katudlo og si kinsa ang mo-coach.
Kompiyansa si Panlilio kay nga anaa pa kuno sa sayong bahin ang qualifying rounds. So di ko masurprisa kon magkamuritsing ang dagan sa bag-ong Gilas, kay maninguha ra man ta og maayo kon anaa na sa apiki nga sitwasyon. Mao ni mentalidad sa Pinoy.
•••
Ako diayng ipahibawo ngadto sa among mga kaperiyentihan ug kahigalaan nga ang haya sa akong amahan nga si Emilio Migallen Sr. ibalhin na ugmang adlaw gikan sa Lourdes Parish sa Punta Princesa ngadto sa St. Peter-Imus hangtod sa Enero 19 sa dili pa kini dad-on didto sa Pondol, Balamban sa Enero 20-21. Ang lubong gikatakda sa Enero 22. (jun.migallen22@gmail.com)