SI TWO-TIME SM Millionaire’s Cup champion Tessa Dianne Galendez-Lim wa kasugakod sa finals, napildi sa twice-to-beat Darius Beloy nga maoy mikampeyon sa Datba December 2019 monthly finals tournament sa SM Lanang Premier Bowling Center, Dominggo, Enero 12.
Si Beloy mipildi ni Galendez-Lim, 191-155, sa usa ka game sa ilang titular showdown aron mabulsa ang top cash prize nga P10,000.
Ang uwahi midawat og P4,000.
Kini ang unang title showdown tali duha ka magduduwa.
Ang kampeyon nauna ng milampurnas og 1,315 ka pins human ang unom ka duwa aron angkunon ang top spot sa step-the-ladder finals sunod si Galendez Lim (14) nga mipaligid og 1,233 pins sa ikaduha, Ulene Rule (33) miiskor og 1,223 sa ikatulo ug Arthur John (13) Galendez nga mipatumba sa 1,211 pins, ikaupat.
Sa step-the-ladder round, ang No. 4 Arthur John nanguna kontra Rule, 208-185, aron maplastar ang duwa tali igsuon niyang si Dianne nga mipildi niya, 224-180.
Si Galendez-Lim, sa pakighinabi via Facebook, Enero 13: “Gikulbaan ko, wala na kaayo ko naanad ug pressure maam.”
Ang 25-anyos nga inahan mipahuwya una sa bowling, ug mibalik niadtong Hunyo 2019 human siya maminyo ug manganak.
“Abi gani nako ako na to mag champ gahapon maam. Pero deserve man pud ni sir Beloy kay first game pa lang, siya najud first always until sixth game,” dungan sa pagsulting gikinahanglan pa gyud niyang magbansay og maayo aron makalabni og titulo.