HAPIT, direyot, duol na, pingis lang, nitipas pa ang giyera, sa atong pinulongan ang nahitabo niadtong niaging semana didto sa Middle East.
Namatay ang heneral sa kasundaloan sa Iran sa usa ka bomba nga gitira sa America ubos sa mando ni Presidente Donald Trump. Nagsadya ang armadong kusog sa United States (US) of America tungod kay sa katapusan ila nang napatay ang usa sa pinakataas nga opisyal sa Iran nga hingpit nga kaaway niini.
Matud pa ni Presidente Trump sa usa ka presscon human sa atake nga dugay na nilang buot patyon ang maong heneral nga gitawag niyang terorista aron motunhay ang kalinaw sa maong dapit sa kalibutan.
Atong nasayran nga ang nasud nga Iran buhong sa produktong lana ug nag-angkon og dakong parte sa Persian Gulf nga importante sa pagbiyahe sa lana gikan sa Middle East padulong sa tibuok kalibutan.
Tungod sa interes sa mga dagkong nasud sa lana sa Middle East sama sa US, Britain, France, Russia, nahimong kolonya sa US ang Iran og gisuportahan niini ang diktaduryang pamunoan ni Shah Pahlavi nga gikasuko sa katawhang Iranian.
Napalagpot ang Shah ug gipulihan sa konserbatibong klerikong Islam nga si Ayatollah Khomeini ug gimando niini ang hugot nga pagsunod sa Islamic nga pagtulon-an ni Propeta Muhammad. Gawas sa US, kontrang mortal usab sa Iran ang kasikbit nga nasud sa Iraq ug Saudi Arabia tungod sa pagpatuta niini sa US.
Busa human gilubong ang patay’ng lawas sa heneral nga napatay sa bomba subay sa tinuohang Islam, nagpalupad gidayon kini og tulo ka “missiles” padulong sa “US military facilities” sa Iraq nga gikabalaka sa tibuok kalibutan.
Matud pa sa US nga walay namatay sa pagbalos sa Iran apan ang pahayagan sa Iran nagtaho nga kapin 80 ka sundalong Amerikano ang namatay sa ilang pag-atake. Nagbahad sab ang kasundalohan sa Iran nga atakihon ang mga barko de guerra sa US nga anaa sa Persian Gulf ug ang Israel nga konsabo sa US.
Sa laing bahin, si Prime Minister Mahathir sa Malaysia nanawagan nga magkahiusa ang tanang Muslim sa kalibutan sa pagkondena sa kamatayon sa heneral sa Iran. Nabalaka ang tanan nga sa pagbalos sa Iran posibleng mo-risbak ang US og paulanan niinig “thermo-nuclear” nga bomba ang Iran nga mas grabe pa ang epekto sa bombang nukleyar nga gihulog sa Hiroshima og Nagasaki sa katapusang bahin sa ikaduhang giyerang mundiyal.
Sa pagkatinuod wala pay bombang nukleyar ang Iran bisan buot og may kakayahan na kining mohimo tungod sa pagbabag sa US apan ang gihuptan niining kombinsyunal nga armas panggiyera igo nang makapasamot sa problemang pangkalinaw sa Middle East.
Maayo na lang pud kay wala mi-risbak ang US, hinunoa gisulti ni Presidente Trump nga girekomenda niini ang dugang “economic sanction” sa Iran sama sa pagpagamay o paghikaw sa ayudang pangkatawhan, medisina, pagka-on, pangnegosyo, edukasyon, teknolohiya ug uban pa.
Ang gikabal-an usab sa Pilipinas kay ang pagbalik og pagsustiner sa panginahanglan sa minilyon nga “overseas Filipino workers” nga maapektohan unya. Mag-ampo kita nga mopatigbabaw ang kabugnaw sa hunahuna. Trabaho ray ato dili ang gahom!