Mag-uuma giputlan og bukton

Mag-uuma giputlan og bukton

CARMEN, North Cotabato -- Gitagod-tagod sa pagtigbas ug wala nay kinabuhi nga nakaplagan ang usa ka mag-uuma alas 4 sa hapon niadtong Dominggo.

Giila ang biktima nga mao si Nicor Vergara, 46, minyo, ugmolupyo sa Barangay Poblacion sa nahisgutang lungsod.

Sa taho gikan sa Cotabato Police Provincial Office (CPPO), nasayran nga misuroy ang biktima sa iyang uma sa Barangay Kibayao apan wala na siya makauli atol sa paniudto.

Apan dunay laing mag-uuma ang nakasulti sa pamilya sa biktima nga nakaplagan siya nga wala nay kinabuhi.

Sa diha nga nagresponde ang mga pulis ug Citizen Armed Forces Geographical Unit (Cafgu), ilang nadiskubre ang patay nga lawas ni Vergara nga nagbuy-od sa daplin sa kalsada duol sa iyang maisan.

Nakaangkon sa daghang samad tinigbasan ang biktima ug naputol ang iyang tuong bukton.

Nahanaw sab ang motorsiklo ni Vergara nga iyang gisakyan paingon sa uma nga gituohang gikawat sa mga mamumuno.

Padayon pang nihimo og dugang imbestigasyon ang kapulisan sa Carmen Municipal Police Station. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph