Babaye pakyas sa ‘promise’ gidunggab

Babaye pakyas sa ‘promise’ gidunggab

ANAA pa sa Southern Philippines Medical Center (SPMC) ang usa ka babaye dihang gidunggab sa iyang kapuyo kay dugay kining miuli ug nakig-uban og laing lalaki.

Alas 3:30 sa hapon niadtong Biyernes nahidangat sa SPMC ang biktima nga si Maricel (bansagon gitago), 22-anyos, taga Rasay Street, Barangay 6-A Poblacion, Davao City human siya gidunggab sa iyang kapuyo nga si Rogelio.

Una niini, nananghid si Maricel nga molakaw, diin gitugtan siya ni Rogelio sa kondisyon nga mobalik dayon.

Dihang kaadlawon na lang hangtud nga nihapon sa mosunod nga mga adlaw diha pa miuli si Maricel sa ilang balay.

Apan sa pag-uli niini, daan nang nag-alburuto ang kasuko ni Rogelio dihang nanugilon ang igsuon ni Maricel nga nakita niya kini sa Roxas Avenue nga dunay kaubang lalaki.

Giingon nga dako ang pagtuo ni Rogelio nga kabit sa iyang kapuyo ang lalaki nga gisugilon kaniya nga maoy hinungdan sa iyang kasuko sa maluibon nga kapuyo.

Gilayong nangutana si Rogelio nganong dugay kining miuli, nasuko na hinuon si Maricel hinungdan nga nalagot si Rogelio ug iya kining nadunggaban.

Dunay samad sa likod ug walang bukton ang biktima kinsa padayon karong nagpaayo sa SPMC.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph