ORMOC City, Leyte - Gipasakaan na og kasong homicide ang sundawo nga nakapusil patay niadtong Lunes, Enero 13, sa iyang sakop nga Citizens Armed Forces Geographical Unit (CAFGU).
Si Army Staff Sergeant Aldrin Madrid, 37, taga Buenos Iris, Victoria, Northern Samar, gitanggong na sa Ormoc City Police human dakpa sa iyang mga kaubang sundawo human sa hitabo niadtong Lunes sa kaadlawon samtang nag-inom.
Si Madrid maoy team leader sa mga sundawo ug Cafgu, nag-inom sa Sityo Mahanagdon, Barangay Tongonan ning siyudad diin nahitabo ang pagpusil kang Jomar Yubal, 24 taga San Joaquin, Capoocan, Leyte.
Matod ni Police Staff Sergeant Jomar Nerves, imbestigador sa kaso, nga nag-inom og tuba si Madrid uban sa iyang mga sakop.
Dugang ni Nerves nga base sa ilang pakighinabi sa mga kauban, hubog kaayo si Madrid ug nag-hallucination nga dunay ‘ungo’.
Nikuha kini sa iyang M16 Armalite rifle ug nagpasalba.
Apan nakabantay si Madrid nga sa ngitngit nga bahin dunay kasikas.
Iyang gikuha ang iyang sidearm nga Gloc pistol ug gipamusil ang lugar nga may kasikas ug didto naigo si Yubal.
Namatay diha-diha si Yubal samtang dali nga gidis-armahan ug gipugngan sa iyang mga kauban sud sa kampo ang suspek.
Matod ni Nerves, alas 5:30 na sa kadlawon, Lunes, Enero 13, 2020 nadawat ang report, apan ang insidente nahitabo alas 12 pasado na sa kadlawon.
“Wala man hinuon silay personal grudge. Nag-hallucination lang gyod ang suspek kay hubog kaayo,” matod ni Nerves.
Nadestino kaniadto sa Marawi City si Madrid.
Nahibawo na usab ang pamilya ni Yubal sa iyang gidangatan. (JKDP)