SA KADTONG wala pa marehistro sa Commission on Election (COMELEC) ug naglaraw nga mobotar sa umaabot nga eleksyon.
Sugod Enero 20, ang Comelec-Cebu City magsugod na og panawat og aplikante para makaboto sa umaabot nga piniliay kansang mga transaksyon molanat hangtod sa Setyembre tuig 2021.
Si Election Officer Marchel Sarno sa Cebu City north district nagkanayon nga labing maayo nga moparehistro og sayo samtang dili pa daghan ang maglinya didto sa ilang buhatan.
“Among giawhag kadtong gustong magparehistro nga dili maglangay bisan kon taas nga panahon ang gihatag sa Comelec aron dili na maproblema sa kataas sa linya kon magsingabot na ang deadline,” padayag ni Sarno.
Gawas sa new registrants, ang Comelec modawat usab og transfer of registration, correction of entry ug ubang transaksyon.
Ang mga nag-edad og 18 anyos ug kadtong mag-edad 18 anyos o pataas nga wala pa marehistro magdala lang og identification card o birth certificate ug bisan unsa nga dokumento nga magpamatuod sa ilang pagkatawo.
Ang Comelec abli sugod 8:00 sa buntag hangtod 5:00 sa hapon gikan sa adlaw nga Lunes hangtod Sabado ug mga holiday. (PAC)