GILANTAWAN nga mas paspas pa unya ang mamahimo nga pagresponde sa quick response team, sa emergency team, Aksyon Agad team, kabomberuhan, kapulisan ug uban pa.
Ang kagamhanan sa dakbayan sa Talisay nga gipanguluhan ni Talisay City Mayor Gerald Anthony Gullas mipirma og kasabutan tali sa Sugbotek Incorporated nga maoy nagdumala sa Guardians Emergency System (GES), niadtong Martes.
Ang GES usa ka mobile app nga mamahimong ma-download sa Google Play nga libre.
Sa higayon nga adunay emergency, direkta ra makontak ang hingtungdan nga response team sa nagkadaiya nga ahensya ug departamento.
Sa maong paagi di kinahanglan nga mag-memorize og number kon hotline.
Matud ni Cloyd Dedicatoria kon wala kay data, apan anaa kay piso nga load nahibilin mamahimo ka gihapon makapadangat sa report. Ang command center na ang manawag kanimo alang sa dugang detalye.
Konsepto sa maong app, mao ang pag-awhag sa publiko diha sa pag-boluntaryo sa pagreport kon adunay nakita nga gikinahanglan og tabang, ilabi na diha sa mga disgrasya, sunog, o uban nga pagpatabang sama sa kon adunay pagbaha ug uban pa.
Wala’y gastuhon ang kagamhanan niini, kundi mao lang ang pagpakig-alayon sa mga responding agency diha sa gobyerno, ilabi na sa command center sa Talisay City hall.
Dugang ni Dedicatoria, nga dili usab makabinuang ang usa ka tawo, kay diha sa ilang pag-download sa app, kuhaon ang imong numero ug ubang detalye kalabot sa nag-download.
Kon tuyu-on ang pagbinuang og report i-block kini sa guardian.
Si Gullas ang nihangop niini, kay nakita niya nga daku kini makatabang ilabi na sa kawsa nila nga gikinahanglan, ‘Aksyon Agad’ sa mga gikinahanglan sa publiko.
Apan matud ni Gullas nga ang mga existing nga numero o hotline sa nagkadaiyang responding team, Aksyon agad team, sa kabomberuhan, Talisay City Disaster Risk Reduction and Management Office, kapulisan ug sa City of Talisay Traffic Operations Development Authority (CT-TODA).
Magamit na kini sud ning buwana. (FMD)