MAKIGHINABI pag usab si Gobernador Gwendolyn Garcia sa kagamhanan sa dakbayan sa Sugbo sa hangyo niini nga temporaryo nga pagbalhin sa Cebu South Bus Terminal (CSBT) karong Sinulog.
Ang hangyo gipaagi sa usa ka resolusyon nga gipasar sa konseho sa dakbayan sa Sugbo niadtong Biyernes, Enero 10, 2020.
Matod ni Garcia nga buot sa konseho nga temporaryong ibalhin ang CSBT sa El Pardo Industrial Roads habig sa Cebu South Coastal Road (CSCR) sugod 3:00 sa kadlawon sa Enero 19, 2020 hangtod na sa pagtapos sa kasaulogan.
Kini aron may mahimong ka-parkingan ang mga VIP sa dakbayan atol sa Sinulog.
Mao usab kini ang himuon nga headquarters sa Provincial Disaster Risk Reduction and Management Office (PDRRMO).
Sa uwahing datos nga gibutyag ni Carmen Quijano, CSBT operations head moabot sa 50,000 ka mga pasahero ang modagsa sa CSBT og 500 ka mga bus ang mobiyahe matag adlaw.
Hinuon, gilantaw ni Quijano nga posibleng mas menos ang mobiyahe atol sa pista apan sanglit buot ni Cebu City Mayor Edgardo Labella nga mahuman og sayo ang kasaulogan, gilaoman ang mas daghan nga mga pasahero ang mopauli sa probinsya.
Alang kang Garcia, uwahi na ang pagpahibaw sa mga pasahero nga ibalhin ang terminal hinungdan nga makighinabi siya pag-usab alang sa final nga desisyon niini. (ANV)