ANG management sa Cebu City Operation Second Chance (CCOSC) nisalikway nga aduna silay nahimo nga pagpabaya hinungdan nga nahitabo ang duha ka higayon sa pag-eskapo sa mga bata niadtong tuig 2019.
Si City Legal Officer Rey Gealon nibutyag nga gibasol sa nagdumala sa CCOSC mao ang kakuwang sa ilang personnel sama sa gwardiya nga maoy mobantay aron masiguro nga walay maka-eskapo sa mga batan-on nga anaa sa ilang kustodiya.
“They denied negligence on their part and blamed on the lack of resources, particularly personnel, to guard and secure the children-residents,” pagkutlo ni Gealon sa giduso nga tubag sa CCOSC nga gipangulohan ni Ambrosio Ibones.
Apan ang City Legal Office nga maoy nag-imbestigar sa duha ka pag-eskapo nga nahitabo niadtong Oktubre 4 ug Disyembre 22, wala makumbinse sa gihimong basehan ni Ibones.
“The investigators are looking at why they are not raising these concerns on normal times or persistently requesting whatever are needed, rather bark about it only when escape incidents occur,” dugang ni Gealon.
Ang rekomendasyon sa City Legal Office mahibaw-an sunod semana nga iduso ngadto kang Mayor Edgardo Labella ug kon unsay nagpaabot nga silot ug kinsay angayan manubag sa maong mga insidente. (PAC)