DILI na unya problema ang air traffic sa Mactan Cebu International Airport (MCIA).
Kini human nga pormal nang gipahigayon ang groundbreaking ceremony sa laing runway kagahapong adlawa, Enero 14, 2020, nga magamit sa higayon nga makasinati ug kakulian ang kasamtangang runway sa Mactan airport.
Ang emergency runway gibana-banang adunay gitas-on nga moabot sa 2.5 kilometros ug nahimutang tupad ra usab sa kasamtangang runway.
Matod ni Steve Dicidican, general manager sa Mactan Cebu International Airport Authority (MCIAA), nga moabot sa P2 bilyones ang budget alang sa civil works niini ug P500 milyones alang sa electric works.
Gikatakda kining mahuman sulod sa duha ka tuig.
Dugang ni Dicdican nga gumikan sa pagtukod sa runway napanglantawan nga mosaka ngadto sa 30 porsyento ang kapasidad sa tugpahanan.
Sa pagkakaron, ang runway sa tugpahanan adunay 30 ka mga eroplano nga mogamit matag oras. Napanglantawan nga mosaka kini sa higayon nga mahuman na ang emergency runway nga mamahimo usab gamiton isip secondary runway.
“There are two principal objectives of this runway. One is, it will solve the disruption of the airport so we will no longer have the vulnerability of the other ariports. If the runway will have any problem we will have to stop the operations that will not matter to us. Second is, it will increase the capacity,” matod pa ni Dicdican.
Dili pa magamit ang duha ka mga runway ug dungan sa pag takeoff ug landing sa mga eroplano.
“We will never be able to use two runways simultaneously because there’s a 1-kilometer from center line to center line but it can be use alternate meaning one aircraft will leave and one aircraft will arrive after,” pasabot sa opisyal.
Gikatakdang makigtagbo pa usab ang MCIAA sa mga airline companies alang sa posibleng pagsira sa karaang runway sulod sa duha ka adlaw gumikan sa pagtrabaho unya sa emergency runway apan sulod lang kini sa walo ka oras.