ARSON ang gisusi sa Bureau of Fire Protection (BFP) nga maoy hinungdan sa sunog sa Barangay Luz niadtong Lunes sa gabii, Enero 13, 2020.
Dunay mga saksi nga nahinabi sa BFP nga nagtumbok sa posibilidad nga tinuyo ang sunog nga niugdaw sa 60 ka mga balay ug nagbilin og P1 million nga danyos.
Sa pakighinabi sa Superbalita Cebu kang SF03 Lowell Opolentesima, chief investigator sa Cebu City Fire Department, siya niingon nga ilang gitutokan ang arson sa imbestigasyon.
Ilang nasayran gikan sa mga saksi nga dunay nagsuyop og shabu sa balay diin nagsugod ang kayo. Duna silay nakuhang dugang nga mga saksi nga nakakita sa pagsugod sa pagsilaub sa kayo.
“Yes. Naa mi gisundan karon sa among imbestigasyon nga intensyon gyud ang pagsunog. Apan dili pa lang sa una namo masulti kay ang witness gipaabot pa namo nga mo execute og affidavit,”matod ni Opolentisima.
Dugang ni Opolentisima nga ang unang mga saksi nga ilang nahinabi Lunes sa gabii nitumbok sa usa ka balay, kansang ngan sa tag-iya gipugngan una, nga didto nagsugod ang kayo sa ikatulong andana sa usa ka balay.
Sa Martes sa buntag, Enero 14, dunay nitumaw nga bag-ong mga testigo.
“Mao na ato gi tutokan karon nga posibleng intentional ang pagsunog. Unya gawas niana duna pami laing investigation nga among gisunod pa,” matod ni Opolentisima sa Superbalita Cebu.
Si FO2 Fulbert Navarro niingon nga alas 8:13 sa gabii gisaka sa second alarm duha ka minutos ang milabay human sa alarma.Dugang ni Navarro nga nakontrolar ang pag-ulbo sa sunog sa firefighters alas 9:50 na sa gabi.
Samtang si Cebu City Mayor Edgardo Labella nabalaka na sa gidaghanon sa mga sunog sa unang buwan pa lang sa tuig.
Iya kining ipaimbestigar sa BFP. Momando usab siya sa pag-reblocking sa lugar.
Hinabang
Makadawat ang kapin 90 ka mga pamilya nga naigo sa sunog og P50,000 gikan sa kagamhanan.
Si Labella nagkanayon nga ang Kagamhanan sa Siyudad mohatag og P20,000 sa mga tag-iya sa balay samtang P10,000 usab sa mga nag-abang. Gipaniguro usab sa National Housing Authority (NHA) nga mohatag sila og P30,000 sa mga tag-iya sa balay.
Si Labella miadto sa lugar aron susihon ang kahimtang sa mga biktima.
Sa Martes sa buntag, nibalik siya para tan-awon kon niabot ba og tulo ka adlaw ang suplay nga gihatag sa kagamhanan.
Giingon ni Labella nga kadaghanan sa mga biktima nangayo og underwear tungod kay wala silay nadala bisan usa.
Si Jeffrey Ibones, pangu sa Department of Social Welfare Services (DSWS), sa iyang bahin, nisulti nga nagsugod sila sa paghatag og mga pagkaon sa mga biktima kagahapon sa buntag. Gihatagan usab nila ang barangay og mga tolda. (dugang taho ni Mae Fhel Gom-os, USJ-R Journalism Intern)