UNSAY hinungdan nga nagsunod-sunod man pagbuto ang tulo ka mga bulkano sa lugar nga gitawag og “ring of fire?”
Kining tulo mao ang Taal Volcano sa Pilipinas, Mt. Popocatepetl sa Mexico ug Mt. Shintake sa Japan.
Duna bay tilimad-on kining maong panghitabo?
Usa kini ka misterio nga naghatag og kakutas sa mga tawo.
Ngano man?
Tungod sa pagtuo sa kadaghanan nga daotan ang tilimad-on niini og delikado kini nga mga panghitabo.
Buyno, husto ang ilang pagtuo nga delikado kini sanglit nasayod na man kita nga daghan gyod ang maalaot kon mobuto ang bolkan. Dunay mangamatay nga mga tawo, mananap o mga tanom. Duna sab mga building o taytayan nga matumpag o kalsada nga mangaguba.
Apan matod pa sa mga siyentipeko, normal ra kaayo ang mga pagbuto sa mga bolkano og hasta ang paglinog sa mga lugar nga nahimutang sa “ring of fire.”
Mao man gani nga gitawag kini og “ring of fire.”
•••
Sama sa usa ka linog, walay mahimo ang mga tawo kon mag-alboroto ang bolkan sama sa Taal Volcano.
Usa kini ka kusog sa kinaiyahan nga lisod sabton og lisod mahibaw-an kon kanus-a kini moboto sanglit tua man sa ilalom sa kalibotan ang tanang mga kalihokan sa bolkan.
Ang makita lang sa bolkan mao ang aso nga mogawas sa bukana niini og ingon man ang panagsang pagtay-og sa yuta duol sa maong bolkan. Wala pa matugkad sa siyensiya ang kahibalo kon kanus-a gyod moboto ang usa ka bolkan.
Sama sa linog, mahimong kusog ug mahimo sab nga hinay lang kini. Mahimo sab nga kausa lang kini mahitabo o kadaghan magbalik-balik.
Dili kini sama sa bagyo nga mahibaw-an na karon kon asa ug kanus-a kini moabot ug unsa kini ka kusog.
Ang atong mahimo mao lamang ang pag-ampo nga unta ilikay kita sa disgrasya.
•••
Daghan sa atong mga kaigsoonan sa Batangas ang nabiktima sa pagbuto sa bolkang Taal.
Daghan kanila ang nawad-an sa ilang mga kabtangan, nawad-an og panimalay, mga hayopan ug uban pang mga butang.
Ang uban kanila, dili na makabalik sa ilang naandan nga mga pinuy-anan tungod kay gidili na kini.
Tungod niini, uban ako sa mga nag-awhag sa mga adunay malumong mga kasing-kasing nga ipadangat nato ang atong hinabang sa mga biktima sa Batangas.
Atong huna-hunaon nga mao na kini ang hustong panahon nga motubag kita sa atong obligasyon sa atong mga kaigsoonan nga nanginahanglan sa atong pagtabang.
Sabton nato nga taliwala sa atong pagsaulog sa Sinulog karong tuiga, kauban nato sa pagselebrar ang tanang mga kaigsoonan nato sa Batangas nga nanginahanglan sa atong kinasing-kasing nga pagsabot. Segurado ako nga kon ato kining buhaton, malipay ang Batang Hesus tungod kay gituman man nato ang iyang hangyo nga pakan-on ang gigutom, paimnon ang giuhaw og saninaan ang mga way sinina.