MIKALIT man lang og kalma si US President Donald Trump ug niingon gusto siya ug kalinaw kauban ang Iran.
Unsa man, nahadlok ang hambugerong si Trump sa Iran, sa dihang gitirahan ug missile ang mga basi militar sa Amerika didto sa Iraq?
Di ba kaha nakaamgo si Trump, nga maapektahan ang iyang kandidatura sa pagka presidente alang sa election karong tuiga?
Samutan pa nga nag-ung-ong sa Senado ang giatubang niining impeachment case nga naaprobahan na sa kongreso.
Daghan man sab gud nga mga Amerikano ang nangasuko ug wa makauyon sa gihimo ni Trump sa pagpapatay ni General Qassem Solaimani.
Nga ang posibling mahitabo nga panimawos mao ang teroristang kalihukan nga mahitabo batok sa Amerika.
Bulkang taal
Luoya sa mga molupyo sa mga lungsod nga duol sa pagbuto sa Bolkang Taal sa Batangas kay gihabulan sa abo ang ilang panimalay.
Wa nay nagpuyo sa maong lugar, nangamatay ang ilang mga mananap nga gibuhi ug mga pananom.
Gipahimuslan pa sa mga salbahis nga mga negusyante pinaagi sa pagtaas sa presyo sa face mask.
Mao nga nasuko ang gobyerno ni Presidente Rodrigo Duterte, nga silutan ang mga negusyante nga nagpahimulos.
Maayo man gani nga ipasok sa baba ang gipangtagoan ug gipatas-an nga presyo sa face mask.
Ang labing maayog klase nga face mask nga mao ang N95 wa na igkita kay gitagoan ug gipaburot ang presyo sa mga way uwaw!
Way kaluoy ang klase sa mga tawo. Ato pa man ganing tabangan nga libre ang mga biktima.
Labella ug Garcia
Gikinahanglan nga andam sa kanunay ang kapulisan sa paghatag og siguridad alang sa kalinaw sa Sinulog.
Ang tinuig nga kalihukan sa Sinulog saksihan sa minilyon ka mga tawo apil na niini ang mga partisipante.
Gani, mosayaw man sila si Cebu City Mayor Edgardo Labella ug Gobernador Gwendolyn Garcia sa probinsya sa Sugbo. (Email: efrenlonzon71@gmail.com / Text: 09235562777)