NATAY-OG ang lokal nga media dihang gipahibalo nga gihimong eksklusibo ang coverage sa Sinulog Festival sa Cebu City Sports Center (CCSC) karong Dominggo, Enero 19. Unang higayon kini sa kasaysayan sa Sinulog ug mapangahasong hukom sa Sinulog Foundation Inc. (SFI) nga tataw nga dili popular nga lakang bisan asang sektor ka mokuha og komentaryo.
Kon gihimong eksklusibo ang coverage sa grandstand, dako ang atong pagtuo nga nibayad ang maong media company nga dili maisip nga major mainstream media outlet sa Sugbo. Nagpasabot nga dili halapad ang ilang maabot sa komunikasyon kon itande sa ubang tradisyonal nga dagkong media nga nag-cover sa Sinulog sukad pa niadto. Dako og natabang sa pagpaila ug pagpasikat sa festival sa tibuok kalibotan.
Ug gawas sa negosyo, dili kaha dunay impluwensiya sa pulitika ang hukom sa SFI? Seguro mahatagan og gamay nga tubag kini nga pangutana kon mautingkay kon kinsay nanag-iya o tag-iya sa gamay nga media outlet nga nakakuha og dakong pabor.
Ang ato lang, ang Sinulog Festival kalihokan sa mga Sugbuanon ug kabahin sa pagyukbo sa makasaysayanon ug milagrusong imahen ni Sr. Sto. Niño, din timaan sa pag-abot sa Kristiyanismo sa Sugbo nga mikaylap sa tibuok nasod ug ngadto sa kontinente sa Asya.
Pipila lang ang nasayod kon si kinsa ang nanaglangkob sa SFI nga niadto gipangulo sa mayor, apan dili na karon. Apan ang ngalan ni Mayor Edgardo Labella maoy dayag sa publiko ug iyang ngalan ang madaut.
Dili ikabaylo sa kuwarta ang maayo ug halapad nga coverage sa Sinulog. Libre na ang advertisements alang sa tumong sa kagamhanan sa pagpalambo sa turismo. Gawas pa, takos sa nindot nga coverage sa media ang presensiya ni Presidente Rodrigo Duterte, kinsa nipahibalo nga mosaksi sa festival isip pangulo sa nasod. Pit Senyor!