NAGMANGTAS si LeBron James sa 2nd half aron agakon ang hosts Los Angeles Lakers ngadto sa dakong kadaugan batok sa iyang kanhi team nga Cleveland Cavaliers, 128-99, kagahapon sa National Basketball Association (NBA).
Ang kadaugan maoy ikasiyam nga sunodsunod nga naangkon sa Lakers, nga padayong naghupot sa liderato sa Western Conference bitbit ang 33-7 nga rekord.
Ikatulo kining sunodsunod nga kadaugan sa Lakers nga wala ang usa sa ilang mga lider nga si Anthony Davis, kinsa nagpaalim sa angol sa iyang likod.
Si James, kinsa wala nakapakita og aksyon sa katapusang duwa sa Lakers gumikan kay aduna kini gipamati sa lawas, igo ra nga nakamugna og walo ka mga puntos sa 1st half.
Apan pagsugod sa 3rd quarter, ang four-time MVP kalit lang nga nagbangis ug nakadugang kini’g 21 puntos sa 2nd half aron humanon ang duwa bawon ang 31 puntos.
Human sa duwa, nagtagbo sila si James ug sa iyang kanhi mga kauban sa Cavaliers nga sila si Kevin Love ug Tristan Thompson aron lab-ason ang ilang panaghigala.
“That’s a brotherhood,” matod ni Love. “That’s a bond that can never be broken. You saw Tristan and myself out there with him. That’s something we’ll always remember and kind of take to our graves. He’s my brother for life, and it is weird playing against him.”
Suod man tuod nga managhigala ang tulo apan atol sa duwa, daw dili sila kaila hilabi na sa mga higayon nga nagguwardiya si Thompson kang James nga maoy kanunay esena sa ilang mga praktis kaniadto dihang nag-uban pa sila sa Cavaliers.
“He made some 3s to get himself going, but he did a good job of getting his teammates involved,” asoy ni Thompson. “I accept the challenge. It’s fun playing against the best player of our generation, and probably one of the best of all time. I love it.”
Maayo sab nga nakaduwa alang sa Lakers mao ang beteranong sentro nga si Dwight Howard, kinsa nitampo og 21 puntos ug 15 rebounds.
Ang Cavaliers, nga nahagbong sa 12-28 nga rekord, gipangulohan ni Love pinaagi sa iyang 21 puntos ug 11 rebounds, nidugang og 17 puntos si Thompson samtang niamot og 16 puntos matag usa sila si Collin Sexton ug Darius Garland.
Mismong ang coach sa Cavaliers nga John Beilein miangkon nga lisod alang kanila ang pagpugong kang James.
“When the pendulum began to swing, we couldn’t stop it,” batbat ni Beilein. “LeBron took charge, just like he always has for a long time.”
Sa laing mga duwa, ningdaog ang Orlando Magic batok Sacramento Kings, 114-112, Portland TrailBlazers batok Charlotte Hornets, 115-112, Oklahoma City Thunder batok Minnesota Timberwolves, 117-104, Boston Celtics batok Chicago Bulls, 113-101, Indiana Pacers batok Philadelphia 76ers, 101-95, ug New Orleans Pelicans batok Detriot Pistons, 117-100 OT. (AP, ESL)